تحليل ليفربول.ريال مدريد

1 بطولة علي أرض الملعب 

فريق كسبها 15 مرة 

والتاني كسبها 6 مرات 

يعني العملية المرة دي مش زي أي عملية 

وكل اللي شوفناه في حياتنا كوم 

والماتش ده كوم تاني خالص 

هقولك كل تفاصيل المعجنة الكروية والتشكيل والتوقعات وكل حاجة 

بس الأول إعمل لايك و اشترك في القناة  

ده لو لا قدر الله مكنتش لسه مشترك ومفعل زي الجرس 

عشان يوصلك كل فيديوهات ومحتوي ستيب سبورت الفاخر..

التفاصيل يا سيدي 

عندنا واحد مش شايف حد وعمال يكسب ومتصدر البريميرليج ودوري الأبطال وفورمة من نار وكل لاعيبته رافعين فيتامين 

والتاني مش شايف قدامه ومركز تاني في الليجا ومركز 18 في دوري الأبطال وفورمة طالعة نازلة وإصابات ومشاكل كتير 

لكن دايماً شعار ريال مدريد في دوري الأبطال 

إن خَس جسمي كفاية إسمي 

و إوعي الفيتامين ينسيكوا أنا مين 

فريق بمدرب جديد لسه بيقول يا هادي 

وسنة أولي بريميرليج 

لعب معاهم في كل البطولات 17 ماتش بس 

وفريق مستقر مدربه معاه بقاله 4 سنين 

ولعب معاهم 190 ماتش 

يلا بينا بقي ندخل في السخن 

عشان احنا النهاردة مش هنحكي عن التاريخ 

احنا كلامنا كله عن اللي جاي 

وعن تفاصيل الماتش 

بس قبل ما نقول التشكيل المتوقع للفرقتين 

عندنا السؤال الموجه فقط لمتابعينا المحنكين 

خبراء الكورة اللي بجد

وعين أعيان كل متابعين منصات اليوتيوب 

متابعين ستيب سبورت 

السؤال هو 

مين الهداف التاريخي لليفربول في دوري الأبطال ؟؟

ومين الهداف التاريخي لريال مدريد في دوري الأبطال ؟؟

وقف الفيديو لحظة 

وجاوب علي السؤال في الكومنتات 

يلا بينا بقي نبدأ بتشكيل الفريق الضيف ريال مدريد 

وعلي غير العادة 

هنبدأ بالمصابين في مستشفى ريال مدريد 

وهما 

البالون دور الحقيقي فينيسيوس جونيور 

اللي هيغيب عن مباراة ليفربول 

بعد إصابته في مباراة ليجانيس الأخيرة 

وكارفاخال اللي لسه قدامه سنة علي ما يرجع من الإصابة 

وميليتاو اللي موسمه انتهي وهيوحشنا بعد الصليبي 

ورودريجو الفاما حاجة 

وديفيد ألابا ابن الغلابة 

وتشواميني ولا آذيك ولا تأذيني 

والتشكيل الأساسي فيه 

أطول رقبة وأطول دراعات الاخطبوط كورتوا حارس مرمي 

قلبين دفاع روديجير قلب الأسد والمدافع الشاب الاكتشاف راؤول اسينسيو

باك شمال فيرلان ميندي وباك يمين 

لوكاس فاسكيز 

نيجي لوسط الملعب 

اللي فيه كامافينجا وبيلينجهام حاجزين أماكنهم الأساسية 

واللاعب التالت 

إما هيكون فالفيردي عادي 

ده لو ملعبش باك يمين 

وإما هيكون مودريتش أو سيبايوس 

وفي الهجوم 

ريال مدريد عنده عجز كبير في عدد المهاجمين 

بعد تأكد غياب رودريجو وفيني

وهنا هيجي دور أخونا المغربي براهيم دياز في الوينج اليمين وبراهيم قدها وقدود 

والنينجا مبابي راس حربة 

وغياب فينيسيوس جونيور 

هيكركب الدنيا في تشكيلة المرينجي 

لأن أنشيلوتي هيكون محتار بين اكتر من حل

إما الدفع بلاعب رابع في وسط الملعب 

زي سيبايوس أو أردا جولير 

أو الاعتماد علي ايندريك أساسي بديل لفينيسيوس جنب مبابي 

اندريك وأردا جولير وفاييخو وسيبايوس وشوية شباب صغيرين 

وهيدخل أنشيلوتي بتشيكلته ورسمه التكتيكي المعتاد 

433 أو 4312 

لو هيخلي بيلينجهام تحت فيني ومبابي 

و بيعتمد فيها علي التحولات السريعة بأقل عدد تمريرات للوصول لمناطق ليفربول 

وفي حالة الدفاع هيقابل من تلتين الملعب medium block 

مع نزول المهاجم التالت سواء كان براهيم دياز أو ايندريك لوسط الملعب 

عشان يكون شكل الفريق 442 في الحالة الدفاعية 

ولتعويض عدم رجوع مبابي للمناطق الدفاعية

ولتجنب الكرات الطويلة في ضهر دفاعاته وانطلاقات اللعيبة السريعة في خط هجوم ليفربول 

الناحية التانية تشكيل ليفربول

 صاحب الأرض والجمهور 

 بفورمة التنين المجنح 

ونبدأ بردو بالمصابين 

لأن غيابهم مؤثر جداً في الفرقتين 

وغايب عن الريدز في المباراة دي 

الحارس العملاق اليسون بيكر اللي مشاركته في محل شك 

وممكن يلحق الماتش 

وترينت الكسندر ارنولد 

اللي عامل مشاكل 

والكلام كتير عليه 

إنه رايح ريال مدريد 

ورافض يجدد عقده 

ولما جاله ريال مدريد عشان يلاعبه 

إتصاب 

لكن ارنولد هو كمان عنده أمل كبير إنه يتعافي بسرعة ويلحق ماتش الريال

و دييجو جوتا اللي هيغيب شهر 

زيه زي المصاب فيديريكو كييزا 

والتشكيل الأساسي فيه 

لو اليسون ملحقش الماتش 

كيلير في حراسة المرمى 

وكابتن الفرقة وعم المدافعين فيرجيل فان دايك 

وجنبه إيبو كوناتي قلبين دفاع 

باك شمال النفاثة روبرتسون 

وباك يمين اااااه تاني الباك اليمين 

بعد إصابة ارنولد اللي ممكن يلحق وممكن لأ

سلوت هو كمان مفيش قدامه غير حل من اتنين 

إما يعتمد علي چو جوميز 

عشان بخبرته وكلاحته الدفاعية 

مع هجوم ريال مدريد وسرعات مبابي 

أو يعتمد علي الشاب الواعد جداً كونور برادلي 

ودي هيكون فيها ريسك عالي 

ووسط الملعب فيه اتنين حاجزين أماكنهم الأساسية 

وهما الهولندي ريان خرافينبيرخ 

والأرجنتيني اليكسيس ماك اليستر

وتالتهم هو كيرتس جونز 

اللي مؤخراً مقدم مستويات مميزة جدا 

لدرجة إنه ركن سوبوسلاي علي الدكة 

وبقي هو الأساسي في تشكيل الريدز 

وثلاثي الهجوم 

أبو مكة محمد صلاح وينج يمين 

ولويس دياز وينج شمال 

وداروين نونيز راس حربة 

وعلي الدكة ليفربول عنده كام فردة تقيلة هيكون ليهم أدوار مهمة في الماتش 

وهما 

سوبوسلاي وخاكبو و إندو وتسيميكاس وكوانساه 

وارني سلوت طريقة لعبه معقده شوية 

لكن علي مين يا حبيبنا 

مفيش حاجة معقدة ولا صعبة عليك 

هنبسطها خالص ونفك شفرتها مع بعض 

في الحالة الهجومية 

لما بتكون الكورة مع ليفربول في مرحلة بناء اللعب 

بيكون شكل الفرقة 

253

الاتنين دول هما قلبين الدفاع 

وبيزق الباكين علي وسط الملعب 

عشان يبقي عنده خمس لعيبة في خط الوسط 

وقدام تلاته ثابتين 

وينجين ورأس حربة 

والخدعة دايما بتكون في اللاعب التالت في وسط الملعب 

سواء سوبوسلاي اللي أخد مكانه كيرتس جونز مؤخراً

واللاعب ده بيتغير مهامه حسب سير المباراة ونتيجتها 

يعني ساعات بتلاقيه بيلعب في مركز 10 

وبيكون صانع ألعاب قدام محورين الوسط 

وأوقات تانية بيكمل جوه منطقة جزاء المنافس عشان يكون راس حربة تاني 

عشان يكون شكل الفريق 424

وياخد معاه مدافع من المدافعين 

أو لاعب خط وسط 

عشان يزود الكثافة العددية لليفربول جوه منطقة الجزاء 

وعشان يفرغ مكان في خط وسط الخصم للزمايله القادمين من الخلف 

واعتماد ليفربول دايماً 

بيكون علي سرعات ثلاثي خط هجومه 

وخلق موقف واحد علي واحد للوينجين صلاح ودياز 

وكرات طولية خلف المدافعين 

نيجي بقي لتوقعات المحللين والخبراء لنتيجة قمة الأبطال 

الطبيعي إن الماتش كالعادة بين ليفربول وريال مدريد 

يكون مفتوح وسريع 

والفريقين هيكون هدفهم الفوز وتسجيل الأهداف 

والحقيقة ليفربول بفورمته الحالية 

العقل والمنطق بيقولوا إنه يقدر يكسب ريال مدريد 

خاصة إن الماتش في الانفيلد 

وانت عارف بقي جحيم الانفيلد 

وكمان عشان ريال مدريد عنده إصابات كتير 

خاصة في خط الدفاع 

وحتي قبل الإصابات 

الفريق لسه موصلش للفورمة اللي مشجعينه مستنينها 

لكن 

العقل والمنطق بيقولوا 

إن ليفربول هو متصدر جدول ترتيب دوري الأبطال 

ب12 نقطة من 4 ماتشات 

ومع مدرب برجماتي زي ارني سلوت 

وبرجماتي يعني واقعي 

ومبدأه اللي تكسب به العب به 

والغاية تبرر الوسيلة 

والغاية هنا هي إنه يحافظ علي صدارته لدوري الأبطال 

يعني هيكون متحفظ 

ومش هيغامر بالهجوم 

إلا إذا استقبل هدف 

والتعادل بالنسباله هيكون نتيجة مرضية 

والعكس صحيح عند أنشيلوتي 

وبرغم إن المافيا كارلو 

هو كمان برجماتي 

لكن وضعه في جدول ترتيب دوري الأبطال 

ب6 نقط من 4 ماتشات في المركز ال18 

يخليه يدخل الماتش وهو حاطط قدامه هدف واحد بس 

وهو الفوز ولا شئ غير الفوز 

برغم الإصابات والفورمة السيئة 

وبرغم حجيم الانفيلد

إذاً 

2-1 لريال مدريد 

أو 1-1 بين الفريقين 

هما أقرب نتيجتين 

تنتهي بيهم معركة ريال مدريد وليفربول 

وفي كل الأحوال 

اللي هيكسب هنقوله مبروك 

واللي هيخسر هنقوله hard luck 

واللي يعطس هنقوله يرحمكم الله 

دلوقتي بقي 

جه دورك يا حبيبنا 

بما إنك زميلنا ومحلل من محللينا 

عايزك تقولي في الكومنتات 

توقعك لنتيجة مباراة ريال مدريد وليفربول 

وتفتكر الماتش هيخلص كام كام ؟؟ 

ولو وصلت لحد هنا تبقي من متابعينا الأوفياء ،،

عشان دي نهاية الفيديو ،،

كل اللي عليك تقولي رأيك في الكومنتات ،،

وتعمل لايك و subscribe و share 

وكل اللي علينا فيديوهات جاية أقوي وأحلي بكتييييير