كاستيلو لوكيبا وزير الدفاع

كاستيلو لوكيبا وزير دفاع ريال مدريد الجديد

أنا جايلك من المستقبل وبقولك إن كاستيلو لوكيبا هيكون أفضل مدافع في العالم من 2025 ل 2035 

مش مصدقني ؟

طيب فتح كلام كده تعالي أعرفك علي صديقي وصديقك الجديد كاستيلو لوكيبا أفضل مدافع شاب في العالم وصفقة ريال مدريد الجديدة لتدعيم خط دفاع الفريق بمدافع مثالي تم اختياره بذكاء شديد جداً 

لوكيبا من مواليد ديسمبر 2002 يعني عمره النهاردة 21 سنة  

 فرنسي من أصل أنجولي ومن مواليد مدينة ليون الفرنسية ومن ناشئين نادي سان جين لافال الفرنسي وبعدها انتقل لنادي ليون الفرنسي وتدرج في المراحل السنية مع الناشئين لحد ما وصل للفريق الأول وعمره 18 سنة بعدها اشتراه نادي لايبزج الألماني ناديه الحالي في صيف 2023 في صفقة قيمتها 34 مليون يورو 

، لوكيبا دخل نادي لايبزج لتعويض جفارديول اللي اشتراه مانشستر سيتي من لايبزج ب 90 مليون يورو 

وبالمناسبة وعلي ذكر جفارديول 

كاستيلو لوكيبا كمدافع أيسر وياك شمال بيتفوق علي جفارديول علي المستوي الفردي في كل شئ تقريباً ودي مش مبالغة في تقدير إمكانيات لوكيبا ، دي حقيقة هيعترف بيها الكل بمجرد انتقال لوكيبا للعب في المستوي العالي مع ريال مدريد في الدوري ودوري الأبطال 

لوكيبا لاعب دولي وتربية منتخبات ومش اي منتخبات ده منتخب فرنسا. اللي تدرج فيه لوكيبا من أول منتخب تحت 17 سنة لحد المنتخب الأوليمبي اللي ظهر معاه لوكيبا بمستويات مبهرة تحت قيادة تييري هنري ولعب لوكيبا لمنتخب فرنسا الأول كمان 

 

مميزات لوكيبا إنه مدافع سريع وقوي جداً في التدخلات الهوائية والأراضية ومدافع طويل طوله 184 سم ، أهم ميزة في لوكيبا إنه مدافع استباقي. يعني ايه استباقي ؟ يعني بيتوقع مسار الكورة وبيتوقع تحركات المهاجمين وبيقرأ اللعب بعقله وذكائه قبل رجله

جودته بالكورة ممتازة علي مستوي التمريرات القصيرة والطويلة 

مميز جداً في ضربات الرأس سواء في حالة الدفاع أو في حالة الكرات الثابتة لفريقه

سنه صغير جداً وهامش التطور المتوقع ليه يفوق كل مدافعين العالم اللي في نفس عمر صديقي كاستيلو وزير الدفاع اللي بيلعب قلب دفاع ايسر وكمان ظهير ايسر و ما شاء الله خمسة في عيني قوة بدنية رهيبة وهادي جداً ويحسسك إن عمره 31 سنة مش 21 سنة وبيتصرف بكل عقل وتقل وده بيخليه ياخد قرارات دائما صحيحة وهو تحت الضغط 

افتكر كلامي وافتكر اسم وشكل لوكيبا كويس عشان بعد شهور قليلة هتسمع جملة لوكيبا أفضل مدافع في العالم 

عيوب لوكيبا . وعشان مفيش لاعب كامل بدون عيوب 

ف لوكيبا لاعب مهاري جدا جدا وبيعرف يرقص ويعدي من لاعب واتنين ومهاراته متقلش عن أجنحة ومهاجمين كتير بنشوفهم في أكبر أندية وأهم دوريات. هتقولي طيب ما دي ميزة مش عيب يا كابتن !!! هقولك ميزة لما صديقي كاستيلو إنه بيستخدم مهاراته دي في التلت الأخير من ملعب الخصم إنما عيب المدافع الفرنسي الموهوب جدااا إنه مهارته وثقته الزيادة في نفسه بتخليه يحتفظ بالكورة ويمشي بيها ويحاول يرقص كمان بس قدام مرمي فريقه في مناطق خطيرة جداً وده بيكلف فريقه كتير لما بتتقطع منه 

لكن ده عيب سببه نقص الخبرة عشان سنه صغير وأكيد مع الوقت هيتحسن في الحتة دي كمان قلة خبرته وسنه الصغير بتخليه متسرع شوية في قراراته في إنه امتي يتقدم وإمتي يستني وإمتي يمرر ويخلص من الكورة وإمتي يحتفظ بيها 

ربط إسم لوكيبا بالأندية الكبيرة زي ليفربول اللي تابع اللاعب لمدة سنة كاملة لما كان لسه في نادي ليون قبل الانتقال ل لايبزج 

وكان ليفربول شايفه هو البروفايل المثالي عشان يكون خليفة فيرجيل فان دايك في الدفاع

كمان تشيلسي دخل علي الخط مؤخراً نادي المليار باوند عشان يخطفه قبل ريال مدريد وفريق كشافين تشيلسي بيتابع لوكيبا من شهور

ريال مدريد بعد فشل صفقة ليني يورو اللي راح مانشستر يونايتد بعدما قدم ريال مدريد عرض ب20 مليون يورو ورفض يدخل مزاد ويدفع اكتر من 30 مليون عشان يشتريه مانشستر يونايتد ب62 مليون يورو الصيف الحالي

وعايز أقولك ده ريال مدريد ربنا نجاه من الصفقة دي 

يورو لاعب موهوب جداً وصغير في السن ودولي وكل حاجة لكنه لاعب إصاباته كتير وبنيته الجسدية واضح عليها الضعف الشديد خصوصاً في عضلات رجليه . ممكن يتطور ويبقي بدنياً أقوي 

لكن علم علي كلامي وافتكر إني قولتلك يورو هيتصاب وهيغيب عن الملعب كتير.

حسب صحيفة the athletic الإنجليزية مانشستر يونايتد نفسه كان علي علم كامل إن ليني يورو عنده مشكلة في مشط رجله وده بالظبط المكان اللي اتصاب فيه ليني يورو إصابة تخليه يعمل عملية جراحية ويغيب 3 شهور وهتخليه معرض لتكرار الإصابة في المستقبل.

بعدها علي طول ارتبط إسم وزير الدفاع لوكيبا بريال مدريد وكشافة ريال مدريد تابعوه في ماتش اتليتكو مدريد ولايبزج في دوري الأبطال وعجبهم جداً وأبهرهم كلهم وفعلا هو مدافع مبهر 

وكمان كاستيلو لوكيبا هو بروفايل مش موجود في ريال مدريد 

قلب الدفاع الأشول اللي بيلعب ناحية الشمال المكان اللي بيلعب فيه روديجير. روديجير من افضل مدافعين العالم لكنه في مارس 2025 هيكون عمره 32 سنة 

ووزير الدفاع هنا مش هيكون بديل روديجير بالعكس لوكيبا كإمكانيات أفضل من روديجير بمراحل 

لكن الخبرة الدولية والأوروبية في صالح روديجير طبعاً لكن المستقبل كله لصديقي لوكيبا

القيمة التسويقية لكاستيلو لوكيبا هي 40 مليون يورو ومتوقع 

وعقده ينتهي مع لايبزج في 2028 بس لايبزج مش تلميذ وعارف إن كل أندية أوروبا تتمني التعاقد مع لوكيبا عشان كده عمل بدل الشرط الجزائي اتنين 

90 مليون يورو هو الشرط الجزائي لو لوكيبا رحل لأي نادي الصيف الجاي 2025

70 مليون هو الشرط الجزائي لو لوكيبا رحل من لايبزج 2026

وكمان نادي ليون الفرنسي ليه نسبة من مبلغ إعادة البيع 

 خطة ريال مدريد الصيف الجاي مش معتمدة بس علي تدعيم الدفاع بلوكيبا لوحده لا ده فلورنتينو بيريز الصيف ده بيضحي وعاملك جلاكتيكوس ع الضيق كده ومحضرلك صيف انتقالات كله مفاجآت من اللي قلبك يحبها  

ترينت الكسندر ارنولد واحد من أفضل الباكات اليمين في العالم ده لو مكنش هو افضلهم عقده ينتهي الموسم الحالي يعني الصيف الجاي هيبقي free ومفيش أي مؤشرات إنه هيجدد عقده مع ليفربول والكلام عن تعاقد ريال مدريد مع ارنولد مش إشاعات 

ريال مدريد اتكلم مع ارنولد ووكيله فعلا 

وزي ما بيقولوا مفيش دخان من غير نار والموضوع هيبقي مسألة وقت ونشوف ارنولد في ريال مدريد 

حتي ارنولد نفسه طلع بتصريحات غامضة زودت الشكوك من كام أسبوع وقالك ما يحفزني هو الفوز بالألقاب وانا نشأت في ليفربول من 20 سنة وجددت عقدي أربع أو خمس مرات قبل كده وكل اللي أقدر أقوله إن أنا الموسم ده هلعب في ليفربول 

الفونسو ديفيز اللي في رأي كتير من المحللين والمدربين والمشجعين هو أفضل ظهير أيسر في العالم رافض كل محاولات بايرن ميونخ لتجديد عقده

ديفيز هو كمان بيقضي آخر شهور في عقده مع البايرن وهينضم لريال مدريد free الصيف الجاي 

حتي إن ريال مدريد قدم عرض مستفز لبايرن ميونخ ب25 مليون الصيف اللي فات للتعاقد مع ديفيز وطبعاً اترفض من بايرن

وبعدها طلع ديفيز بتصريحات بيقول فيها سواء كنت هجدد عقدي أو مش هجدد بايرن ميونيخ هيفضل في قلبي وأجهش بالبكاء 

في كلام اعتبره الجميع رسالة وداعية من ديفيز لبايرن ميونخ وجماهيره.

مستقبل ريال مدريد مضمون وكل صفقاته للمستقبل وده ينطبق علي صفقة كاستيلو لوكيبا كمان بس وزير الدفاع الجديد لريال مدريد مدافع للحاضر وللمستقبل 

بس بعيد عن الإشاعات بص معايا كده علي سكواد ريال مدريد 

الفونسو ديفيز 23 سنة 

ارنولد 25 سنة 

لوكيبا 21 سنة

فينيسيوس 24 سنة 

مبابي 25 سنة 

اندريك 18 سنة 

فالفيردي 26 سنة

تشاوميني 24 سنة 

كامافينجا 21 سنة 

اردا جولير 19 سنة

براهيم دياز 25 سنة

بيلينجهام 21 سنة 

رودريجو 23 سنة 

واخد بالك إن ريال مدريد الصيف الجاي هيكون فريق مرعب وشاب بالكامل معدل أعماره 24 سنة وكلهم في مرحلة التطور والتألق والانفجار . يعني خلاص مهكر الحاضر والمستقبل ومأمن علي كل مواهب العالم ولبسهم الأبيض الملكي عشان يضمن بقاءه في القمة ويحجز لقب نادي القرن ال21 من دلوقتي.

ليه لأ ريال مدريد الصيف الجاي ميفكرش في لاعب زي كول بالمر من تشيلسي أو ويليام ساليبا من ارسنال ؟

أو لعيبة تانية انت شايفهم مناسبين لريال مدريد 

قولي في الكومنتات اللعيبة اللي في رأيك ريال مدريد محتاجها ويكونوا إضافة قوية للفريق!

لو وصلت لحد هنا تبقي من متابعينا الأوفياء 

عشان دي نهاية الفيديو 

كل اللي عليك تقولي رأيك في الكومنتات وتعمل لايك و subscribe و share 

وكل اللي علينا فيديوهات جاية أقوي وأحلي بكتييييير