ايلون ماسك ليفربول

وكما قال الفنان مروان موسي 

جاي من المستقبل حاسس إني راكب تسلا 

أنا كمان جايلك من المستقبل وبقولك نادي ليفربول كله هيبقي راكب تسلا 

عارف إنك مش لاقط ولا فاهم الكلام علي إيه بالظبط ؟؟

وإيه علاقة تسلا بليفربول أصلا ؟؟

القصة وما فيها ،،، هحكيهالك كلها من أولها لآخرها ،،،

بس الأول إعمل لايك و اشترك في القناة  

ده لو لا قدر الله مكنتش لسه مشترك ومفعل زي الجرس 

عشان يوصلك كل فيديوهات ومحتوي ستيب سبورت الفاخر..

والحاجة التانية هي السؤال المعتاد الموجه فقط لمتابعينا المحنكين 

خبراء الكورة اللي بجد ،، وعين أعيان كل متابعين منصات اليوتيوب ،،،،،، متابعين ستيب سبورت 

والمرة دي عشان انت اثبتلي إنك جامد ومتابع وبتجاوب صح في الكومنتات في كل الفيديوهات اللي فاتت 

نصعد الموضوع شوية وهيبقي ليك عندي بدل السؤال سؤالين ،،،

السؤال الأول هو:

مين هو الهداف التاريخي لليفربول في دوري أبطال أوروبا ؟؟

والسؤال التاني :

كم مرة فاز فيها ليفربول بدوري الأبطال ؟؟

وقف الفيديو لحظة واحدة وجاوب علي الأسئلة في الكومنتات ،،،

وحكايتنا أول واهم حاجة فيها هي الأرقام 

وأول الأرقام هو الرقم اللي أعلنه مؤشر بلومبيرج للمليارديرات ربنا يوعدك ويوعدنا 

و بلومبيرج قال إن ثروة الملياردير الأمريكي ايلون ماسك يوم الأربع اللي فات بقت 447 مليار دولار 

يعني واحنا بنتكلم دلوقتي الراجل داخل علي نص ترليون دولار 

ودي أكبر ثروة في التاريخ

وده حصل بعد ما سهم شركة تسلا للسيارات الكهربائية ارتفع بنسبة %71 

والرقم التاني معانا من مؤسسة فوربس العالمية وهو القيمة السوقية لنادي ليفربول اللي اتقدرت مع بداية السنة الجديدة 2025 ب 4.3 مليار دولار ،،،،

يعني تقريبا %1 من إجمالي ثروة ايلون ماسك راعي التسلا 😂

لحد كده كلام جميل ومحترم وزي الفل ….

ايه بقي الرابط بين الأرقام دي يا كابتني ؟؟

الرابط إن ليفربول هيبقي تسلا وتسلا هتبقي ليفربول …..

وأغني راجل في العالم ايلون ماسك قرر يستحوذ على ملكية نادي ليفربول …..

بدأت القصة في 17 أغسطس سنة 2022 بتويته علي موقع إكس 

اللي هو تويتر سابقاً ،،،،

أعلن فيها ماسك عن نيته شراء نادي مانشستر يونايتد ،،،،

وقال : هاي ،،، أنا هشتري مانشستر يونايتد..

عشان الناس ترد عليه وتقوله : انت بتتكلم بجد والنبي يا ايلون ؟؟

ورد ايلون : لا انا بهزر .. أنا مش هشتري أي نادي رياضي..

وكمل ماسك كلامه وقال: بس لو حصل في المستقبل واشتريت نادي،، فالنادي ده هيكون مانشستر يونايتد فريقي المفضل منذ الطفولة..

ومات الكلام علي كده في وقتها …..

لحد ما حصلت المفاجأة مؤخراًّ والكلام زاد عن نية ايلون ماسك شراء نادي ليفربول ،،،،

وانت عارف يا كابتني ،،، مفيش دخان من غير نار

يعني دي مش إشاعات .. والكلام ده مش طالع بالصدفة 

والدليل،،، إن الحاج ماسك الكبير أوي شخصياً في مقابلة مع راديو تايمز،،،، الحاج إيرول ماسك والد إليلون طلع من أيام واتكلم عن قصة ماسك وليفربول وقال : 

حصل وايلون فعلا عايز يشتري نادي ليفربول وأنا كمان بصراحة نفسي ابني يشتري النادي زي أي حد أكيد نفسه يشتري نادي ليفربول..

لكن علي مبدأ داري علي شمعتك تقيد وداري علي فرختك تبيض 🥚

كمل الحاج ماسك كلامه وقال: بس ده مش معناه إن ابني خلاص هيشتري ليفربول فعلا 

عشان كلامي ده ممكن يعلي سعر النادي وإلون كده هيشتري بالغالي…

والدليل التاني علي إن الموضوع بجد ومش مجرد إشاعات 

إن مجموعة فينواي الرياضية المالكة لنادي ليفربول طلعت بيان ينفي نيتهم بيع النادي في المرحلة الحالية.

وانت عارف القاعدة اللي بتقول نفي النفي إثبات 

والغرض من النفي هو الحفاظ علي سعر وأسهم النادي من النزول 

عشان فينواي سبورتس دول نفسهم عرضوا نسبة من أسهم النادي للبيع سنة 2022 وبعدها باعوا جزء من أسهم النادي فعلا لصندوق استثمار أمريكي سنة 2023 

وعملوا قبلها بيان نفي بردو 😉

وأهم نقطتين في الموضوع هما،،،

أولاً تفاعل الساكاوز جمهور الريدز ليفربول مع نية ماسك شراء النادي 

ومنهم اللي كان مبسوط وطاير من الفرح إن أغني راجل في العالم هيشتري النادي 

ومنهم اللي كان قلقان من سمعة ماسك عن سياساته التقشفية وخايفين يعمل زي ما عمل في تويتر أول ما اشتراه ،،، يمشي موظفين ويقلل نفقات ورواتب.

والنقطة التانية المهمة في كلامنا ،،،،

هي توقيت الكلام عن صفقة تسلا ليفربول ،،،،

لأن التوقيت ده برغم تصدر ليفربول لجدول ترتيب الدوري الإنجليزي وكمان تصدره لجدول دوري أبطال أوروبا 

إلا إنه وقت فيه ملفات سخنة ومشاكل داخلية جوه النادي ،،،،

زي ملف تجديد عقود أهم لعيبة الفريق محمد صلاح وترينت الكسندر ارنولد وكابتن النادي فان دايك،،،،

اللي كلهم تنتهي عقودهم نهاية الموسم الحالي ،،،،

واللي جايلهم عروض من كل حتة ،،،

وآخرهم كان عرض ريال مدريد لليفربول لبيع الكسندر ارنولد ب20 مليون يورو،، وده طبعاً اترفض.

والآن مع المفاجأة الكبري …..

اليون ماسك طلع ليفربولي يا رجالة ……

وليفربولي مش معناها بيشجع ليفربول ،،،،

ليفربول يعني جدته أم أبوه الحاج إيرول ،،،

مولودة في مدينة ليفربول ،،،،

وجدته دي هي اللي مربياه ،،،

 وكان بيقضي الإجازات معاها في ليفربول وهو طفل صغير،،،

عشان كده المدينة والنادي هما جزء مهم جداً من طفولة ايلون ماسك.

وعيلة ماسك ليها جذور في إقليم الميرسيسايد ،،،

وليه قرايب كتير هناك ولسه العيلة مرتبطة بمدينة ليفربول لحد دلوقتي.

 

عشان كده ميغركش بيان نفي ملاك ليفربول لنية بيع النادي

فينواي سبورتس المالكة لليفربول،،

 اشترت النادي سنة 2010 ب300 مليون جنيه استرليني بس،،

يعني لو باعوا النهاردة ،،،

هيكسبوا 14 ضعف الرقم اللي اشتروا بيه النادي

وصاحب space x للصواريخ والأقمار الصناعية وتطبيق X وتسلا للسيارات الكهربائية ،،،

صاحب ال53 سنة مش هيحل في موضوع ليفربول ده ،،،،

ده راجل لما بتهب في دماغه حاجة مش بيرتاح إلا لما يعملها ..

قولي رأيك في الكومنتات بعيد عن الانتماءات سواء كنت مشجع ليفربول أو نادي تاني،،،

تفتكر ايلون ماسك هينجح في شراء ليفربول وهيقدر قريب يخلص الصفقة ويستحوذ علي النادي ؟؟

  ولو حصل واشتري النادي تفتكر هينجح ؟؟؟

وتفتكر لو حصل هيجدد لصلاح وارنولد وفان دايك ؟؟؟

ولو وصلت لحد هنا تبقي من متابعينا الأوفياء ،،

عشان دي نهاية الفيديو ،،

كل اللي عليك تقولي رأيك في الكومنتات ،،

وتعمل لايك و subscribe و share 

وكل اللي علينا فيديوهات جاية أقوي وأحلي بكتييييير