نيوكاسل السعودي

في الكورة فيه 3 أندية 

تقدر تعمل كل اللي هي عايزاه 

وتصرف فلوس زي ما تحب 

ولا يهمها لعب مالي نظيف 

ولا بيع لعيبة عشان تقدري تشتري 

ده كلام قاله يورجن كلوب 

وكان يقصد بال3 أندية دول 

مانشستر سيتي وباريس سان جيرمان ونيوكاسل 

والكلام اللي علي المتغطي ده 

هنخليه دلوقتي كلام ع المكشوف 

هقولك ايه الحكاية و إيه أسرار القصة  

بس الأول إعمل لايك و share و اشترك في القناة  

ده لو مكنتش لسه مشترك ومفعل زر الجرس 

عشان يوصلك كل فيديوهات ومحتوي ستيب سبورت الفاخر..

بدأت حكايتنا سنة 2021 

لما قرر صندوق الاستثمارات العامة السعودي الاستحواذ علي حصة%100 من ملكية نادي نيوكاسل يونايتد الإنجليزي 

بصفقة وصلت ل 340 مليون جنيه استرليني وده حوالي 430 مليون دولار 

ووقتها كلنا اعتقدنا إن سيناريو حرب النجوم اللي عملوه مانشستر سيتي وباريس سان جيرمان هيتكرر من تاني 

ونيوكاسل هيعلي عليهم ويعمل كارير مود 

وبدأنا نسمع إشاعات عن مفاوضات نيوكاسل مع أغلي نجوم العالم 

زي ميسي ونيمار وكريستيانو وصلاح وراموس وهاري كين

وهيجيب جوارديولا يدرب كمان 

لكن علي أرض الواقع ، كل ده كان فوتوشوب 

ومشروع صندوق الاستثمارات السعودي اعتمد علي استراتيجية الاستثمار طويل الأمد ومستدام

ومشجع نيوكاسل اللي كان بيحلم بجوارديولا وانشيلوتي ويورجن كلوب جابوله مدرب انجليزي شاب 

وسؤال الحلقة النهاردة 

اللي هيعرف إجابته بس .. هما المتابعين الخبراء في الكورة الإنجليزية 

عايزك توقف الفيديو لحظة 

وتقولي في الكومنتات 

مين هو مدرب نيوكاسل الحالي ؟؟

والحقيقة المدرب اللي انت كتبت إسمه في الكومنت ده اللي بيدرب الفريق من 2021 ولحد النهاردة 

نجح بشكل مثير جدا للإعجاب في تحويلهم من فريق كل موسم بيحارب علي البقاء في البريميرليج 

لفريق كل موسم مرشح للتأهل للبطولات الأوربية وحجز مكان في مركز متقدم وفرقة كورة الكل بيعملها حساب .

وبداية النجاح كانت في تأهل الفريق لدوري أبطال أوروبا في أول موسم كامل مع الملاك الجدد.

وبعد قصة المدرب .. جه وقت أهم ملف عند الجماهير 

وهو ملف الصفقات واللعيبة 

ودي قصة حزينة تم فيها دشملة خواطر جماهير نيوكاسل وجمهور الكورة اللي كان نفسه يشوف قوة عظمي جديدة واتمني إن الستة الكبار يزيدوا واحد ويبقوا السبعة الكبار

وكانت أول صفقة كبيرة للنادي بعد الاستحواذ السعودي هي صفقة كيران تريبيير!!!

 وبعدها انضم كريس وود وبرونو جيماريش ودان بيرن لنيوكاسل خلال فترة الانتقالات الأولى للملاك السعوديين الجدد

والموسم اللي بعده 2023-2022

كان أكبر موسم إنفاق للنادي تحت الإدارة الجديدة 

   وصرف ال Magpies 

185 مليون يورو

 على ألكسندر إيزاك ، أنتوني جوردون ، سڤين بوتمان ، مات تارجيت ، نيك بوب ، هاريسون آشبي، تشارلي ماك آرثر وجارانج كول.

وبعدها استمر الصرف والصفقات موقفتش في الموسم اللي بعده واللي بعده 

عشان يكون إجمالي صرف الصندوق السعودي علي صفقات نيوكاسل من 2021 لحد دلوقتي 

  ما مجموعه 508.3 مليون يورو على الانتقالات.

والتفاصيل كانت كالآتي 

موسم إجمالي الإنفاق

2021-22 101.1 مليون يورو

2022-23 185.8 مليون يورو

2023-24 153.2 مليون يورو

2024-25 68.2 مليون 

وألكسندر ايزاك هو أغلي صفقة لنيوكاسل . 

وانضم الدولي السويدي للنادي من ريال سوسيداد الاسباني مقابل 70 مليون يورو في 2022.

ويحتل لاعب خط الوسط الإيطالي ساندرو تونالي المركز التاني في القائمة، بعد انتقاله بمبلغ 64 مليون يورو من اي سي ميلان في 2023. 

والمافيا الإيطالي ده طبعاً تم إيقافه بسبب المراهنات زي ما انت عارف يا كابتن.

وبعد كده قائمة أغلي صفقات دي فيها الشاب الانجليزي الموهوب بشدة انتوني جوردون ب45 مليون يورو من ايفرتون كثالث أغلى صفقة ل نيوكاسل 

  و هارفي بارنز ب44 مليون يورو من ليستر

وبرونو جيماريش ب42 مليون يورو من ليون الفرنسي 

ودول كانوا المراكز الخمسة الأولى.

وحقق نيوكاسل إجمالي 127.3 مليون يورو من مبيعات اللاعبين من 2021 وحتي الآن 

وبعد كل الاحصائيات والأرقام دي 

الصرف علي الصفقات قل بشكل كبير موسم 2024 وسط تساؤلات واستغراب من المشجعين

وبدأ جمهور نيوكاسل يشك إذا كان الملاك السعوديين لسه عندهم نفس الطموحات اللي كانت عندهم وقت ما اشتروا النادي !!

في تحقيق نجاحات علي المستوي المحلي الانجليزي والمستوي الأوروبي والعالمي 

وده مش بسبب بخل ملاك وإدارة النادي 

هو مش مش عايز … هو مش قادر 

وبقي شعار المرحلة… أنا مش قادر أديك 

وده سببه إن الصياد أصبح فريسة 

والنادي اللي كان كل موسم انتقالات بيصرف علي انتقالات اللاعبين مبالغ كبيرة 

خلاص استنفذ رصيده المسموح بيه من شراء اللعيبة وعلي حافة إنه يكسر قواعد الربح والاستدامة للدوري الانجليزي الممتاز 

وجه الوقت اللي لازم يبيع فيه لعيبة بأرقام كبيرة 

عشان يقدر يشتري لعيبة جديدة من تاني 

والمشكلة إن آخر فترات انتقالات للنادي 

محققتش أرقام كبيرة علي مستوي بيع اللعيبة 

 

عندك تريبيير وكالوم ويلسون و ألميرون وفابيان شير و دان بيرن كلهم لعيبة كاسرين التلاتين لو اتباعوا هيجيبوا ملاليم ومش هيساووا حاجة في سوق اللعيبة 

ومن الآخر كده 

النادي مفيش فيه غير أربع لعيبة عليهم العين 

وبيع اتنين منهم علي الأقل 

هيحل كل مشاكل النادي 

والأربعة هما 

الكسندر ايزاك وده حلم كل الأندية الكبيرة 

وأقرب نادي يقدر يخطفه هو تشيلسي 

وبيعه يدخل لنيوكاسل فوق ال120 مليون مرتاح 

والتاني هو برونو جيماريش 

اللي أقرب لمانشستر سيتي من أي وقت مضى 

والصفقة دي فيها ميقلش عن 100 مليون لخزنة نيوكاسل 

والتالت انتوني جوردون 

اللي انتقاله لليفربول مسألة وقت 

ومتوقع يتباع بمبلغ فوق ال60 مليون 

والرابع والأخير هو قلب الدفاع الهولندي 

الوحش بوتمان

وده اللي هيشتريه هيبقي محظوظ بيه 

ولو قرر النادي يبيعه 

بكرة الصبح يجيله بالميت 45 مليون علي الترابيزة 

وبيع اللعيبة دي هيعمل مشكلة كبيرة للنادي 

لأنه هيحتاج يشتري لعيبة بنفس مستواهم عشان يعوضهم.

بس مفيش قدام الفريسة نيوكاسل غير إنه يبيع 

عشان يرجع من تاني يبقي صياد

وكلها كام يوم وهنشوف الماجبايس هيعمل ايه مع بداية فترة انتقالات يناير 

هيبيع الغوالي ؟؟

ولا هيشتري لعيبة كسر يستر بيها نفسه ؟؟

ولا هيأجلها للصيف ؟؟

عايزك تقولي رأيك في الكومنتات 

هل هينجح صندوق الاستثمارات العامة السعودي في تحويل نيوكاسل لنادي عالمي قادر علي تحقيق البطولات ؟

ولو وصلت لحد هنا تبقي من متابعينا الأوفياء ،،

عشان دي نهاية الفيديو ،،

كل اللي عليك تقولي رأيك في الكومنتات ،،

وتعمل لايك و subscribe و share 

وكل اللي علينا فيديوهات جاية أقوي وأحلي بكتييييير