جيوكيريش برشلونة

ريال مدريد عنده مبابي ،، 

والسيتي عنده هالاند ،،

ويوفنتوس عنده فلاهوفيتش ،،

وليفربول عنده نونيز ،،

وانتر عنده لاوتارو وتورام ،،

وبايرن عنده هاري كين ،،

وتشيلسي عنده جاكسون ونكونكو ،،

ودول عيان وميت ،،

وجمهور تشيلسي بدأ يزرق منهم بجد ،،

بسبب العفن الكروي اللي بيقدموه ،،

بس أهو حالهم أحسن من حال أرسنال ،،

اللي هجومه يصعب ع الكافر

وبرشلونة عنده ليفاندوفسكي ،،

صحيح بس 36 سنة ،،

وانت عارف بقي يا كابتني الجسد لا يرحم ،،

انت دلوقتي أكيد فهمت الكلام علي ايه ؟؟

لأ اوعي تقول لسه مفهمتش ،،

ده انا مراهن عليك ،،،

انا هقولك الكلام على ايه ،،

الكلام علي موت …

بس الأول إعمل لايك و اشترك في القناة  

ده لو لا قدر الله مكنتش لسه مشترك ومفعل زي الجرس 

عشان يوصلك كل فيديوهات ومحتوي ستيب سبورت الفاخر..

كلامنا عن المهاجم الفتوة الفتاك السفاح الوحش ،،

في كل الأندية الكبيرة دي ،،

هتلاقي مهاجم 9 ،،

بنفس المواصفات ،،

طويل ،،

قوي ،،

سريع ،،

بيلعب بدماغه ،،

بيشوط برجليه الاتنين ،،

بيحجز بجسمه علي الكورة ،،،

عفيجي وقت العافية والعضلات ،،،

ومزاجنجي وقت تشغيل الدماغ ،،،

وأقوي وأهم وأعلي سهم طالع في أوروبا وفي العالم كله ،،

هو فيكتور جيوكيريش ،،،

محارب الفايكنج ،،

السويدي صاحب مواليد 1998 ،،

يعني النهاردة عنده 26 سنة ،،

واستوي ،،

وخلاص جاهز ياكل أي منافس ،،

مهما كان إسمه ،،

وسهمه عالي عشان عنده كل مواصفات المهاجم ال9 الفتاك الكلاسيكي ،،،

بس خلي بالك من حاجتين مهمين جداً ،،

فليك باني أساس طريقة لعبه علي الضغط العالي ،،

والضغط العالي ده بيكون أهم لاعب فيه ،،

وأول المدافعين ،،،

هو رأس الحربة مهاجم الفريق ،،

عشان كده مهاجم فليك ،،

لازم يكون طول الوقت بيجري ،،

 وبيضغط ضغط عالي ،،

 وبيتحرك طول ال90 دقيقة ،،

وده عايز صحة ولياقة وسن يسمح بالهلك ده كله ،،،

ولما يكون المهاجم الوحيد اللي عندك ،،،

معدي ال36 سنة وماشي في ال37 ،،

هتبقي معادلة صعبة ومعضلة كبيرة ملهاش حل ،،

لكن هانز فليك تحايل عليها بعبقرية شديدة يحسد عليها ،،،

وهي إنه يوفر المجهود الكبير ده علي ليفاندوفسكي ،،،

ويحمله علي الجناحين لامين يامال ورافينيا ،،،

ويخليهم هما اللي يقوموا بالضغط علي مدافعين الخصم ،،،

ويكلف ليفا بس بالتحرك الطولي بين قلبين الدفاع ولعيبة خط وسط الفريق المنافس ،،،

عشان يراعي مجهوده القليل بحكم سنه الكبير ،،

ويوفر الجري واللياقة كلها للمجهود الهجومي ،،،

لكن تخيل كده لو لا قدر الله ،،،

ليفاندوفسكي اتصاب ،،،

برشلونة هيعمل ايه ؟؟

وحتي من غير ما يتصاب ،،،

برشلونة بينافس في دوري اسباني دوري الأبطال وكاس ملك اسبانيا ،،،

والبطولات دي هتزيد ،،

بعد حصول برشلونة المتوقع علي بطولة واحدة علي الأقل الموسم ده ،،

عشان كده فليك وإدارة برشلونة اللي بيمثلها المدير الرياضي ديكو ،

وبدأوا الكلام والمفاوضات فعلا مع سبورتنج لشبونة ،،،

للتعاقد مع جيوكيريش ،،،

لكن برشلونة هيواجه حرب سخنة ،،

ومنافسة شرسة وشديدة جداً ،،،

ومزاد علني من أندية كتيرة بتحلم بضم السويدي الفتاك ،،

وأطراف الحرب دي كلهم قوي عظمي في الكورة :

منهم ارسنال ،،

 اللي حاول يضم فيكتور جيوكيريش فترة الانتقالات قبل بداية الموسم الحالي ،،

لكنه فشل ،،

بس ارسنال لسه بيحاول وهيحاول لآخر نفس يفوز بيه ،،

وكلنا عارفين إن المدفعجية في أمس الحاجة لمهاجم صريح ،،

وعندهم مشكلة كبيرة في خط الهجوم ،،

وحلها الأمثل هو مهاجم لشبونة ،،

ونادي النصر السعودي ،،

اللي نازل بتقله ،،

وراصد ميزانية كبيرة بملايين الدولارات ،،

والنصر مهتم جداً بالتعاقد مع مهاجم اوروبي كبير ،،

عشان يعوض الأسطورة كريستيانو رونالدو ،،

اللي بيقضي آخر موسم ليه مع النصر ،،

وعقده ينتهي الصيف الجاي ،،،

ووقع اختيارهم علي هداف الدوري البرتغالي جيوكيريش ،،

عشان حتي لو رونالدو كمل مع النصر

 هيكون جيوكيريس شريك مثالي ليه في خط هجوم النادي السعودي الكبير..

وباريس سان جيرمان ،،

بعدما كان مهتم بجيوكيريس الصيف اللي فات ،،

جدد اهتمامه من تاني ،،،

 

بالتعاقد مع مهاجم هداف ،،

برغم إنه الموسم اللي فات ،،

تعاقد مه الفرنسي كولو مواني ،،

اللي اشتراه باريس بمبلغ فوق ال100 مليون دولار ،،،

والمهاجم الدولي البرتغالي جونزالو راموس اللي دفع فيه باريس 80 مليون يورو ،،

والاتنين طلعوا بلح ،،

وبضاعة التفها الهوي …

وخطة الكبير الباريسي هي تعويض الصفقتين المضروبين بالصفقة الحلم الفايكنج فيكتور ..

ومانشستر يونايتد ،،

أحدث المنضمين للحرب علي صفقة الموسم ،،

واليونايتد دخل في الصفقة دي بحظوظ كبير للفوز بيها ،،

وعنده سببين مش سبب واحد ،،

السبب الأول هو انتقال روبين أموريم ،،

مدرب سبورتنج لشبونة السابق ،، 

لتدريب الشياطين الحمر ،،

وأموريم هو أدري الناس بجيوكيريش ،،

لأنه كان بيدربه لمدة موسم كامل ،،

ونجحوا سوا في لشبونة ،،

ولسه مسجل هاتريك سخن في مانشستر سيتي ،،

تحت قيادة أموريم …

وحلم مانشستر يجمع أموريم مع مهاجمه المفضل ..

والسبب التاني ،،،

هو حاجة اليونايتد لمهاجم حقيقي ،،،

ينهي مشكلة هويلوند ،،

اللي خبرته قليلة ،،

وإصاباته كتير ،،

وبعد موسم ونص لسه مش قادر يثبت نفسه ،،

وصفقة زيركزي المضروبة ،،

اللي لبسهم فيها تين هاج ..

 

وحتي مانشستر سيتي وبايرن ميونخ داخلين السباق ،،

ودول بصراحة داخلين رخامة وكلاحة ،،

واحد عنده ايرلينج هالاند ،،،

والتاني عنده هاري كين ،،،

داخل وعايز تشتري مهاجم ليه ؟؟؟

وبعد ما حكيتلك القصة بالتفصيل ،،

دلوقتي بقي هنتكلم في الفلوس والأرقام ،،،

ودي أهم حاجة في القصة وفي الكورة كلها ،،،

سبورتنج لشبونة في صيف 2023 ،،

اشتري فيكتور جيوكيريش من كوفنتري سيتي الإنجليزي ،،

ب24 مليون يورو ،،،

وقيمته السوقية النهاردة 70 مليون يورو ،،،

وعنده ينتهي 2028 ،،

والشرط الجزائي في عقده 100 مليون يورو ،،،

والحاجة الغريبة !!!

إنه من كام يوم ،،

بعد ما الكلام كتر علي اللاعب بتاعهم ،،

وبقي بيحيلهم كل يوم عرض من نادي شكل ،،،

وبرغم ال100 مليون دولار الشرط الجزائي ،،،

سبورتنج لشبونة موافق علي بيع جيوكيريش ،،

 ب60 مليون يورو بس !!!

وده سببه إن اللاعب متفق اتفاق ودي بالحب كده مع النادي ،،

إنهم يبيعوه للنادي اللي هو هيختاره وهيقنعه بمشروعه ،،

بمبلغ من 60 ل 70 مليون يورو بالكتير …

وعشان كده ،،،

داخل برشلونة الحرب بخطة محكمة ،،،

وكله حماس بحسمها بدري بدري ،،،

عشان يخطف جيوكيريش من كل الأسود دول ،،،

لأنها صفقة لُقطة ،،

وفرصة مش هتتعوض ،،،

وكلفت إدارة برشلونة بقيادة خوان لابورتا ،،

المدير الرياضي ديكو ،،

بخطة مكونة من 3 استراتيجيات لحسم الصفقة :

أول محاولة هتكون صفقة تبادلية بين للبارسا ولشبونة ،،

هيدفع فيها برشلونة 40 مليون يورو ،،

زائد مهاجم برشلونة المعار لريال بيتيس البرازيلي فيتور روكي ،،

اللي اشتراه برشلونة الموسم اللي فات ب60 مليون يورو ،،

وفيتور روكي ده ،،

 كان سبورتنج لشبونة ،،

 عايز يشتريه من برشلونة في بداية الموسم ب30 مليون يورو 

اللي هو ديكو هيدخل يقولهم :

 هات فيكتور وخد فيتور و 40 مليون

وربنا يباركلك ويباركلنا ،،

ويدينا خيرهم ويكفينا شرهم …

الورقة التانية اللي هيلعب بيها ديكو لحسم الصفقة هي :

استغلال حقوق برشلونة في عقد لاعبه السابق ولاعب سبورتنج لشبونة الحالي فرانسيسكو ترينكاو ،،

وحقوق برشلونة دي عبارة عن :

خيار إعادة شراء ترينكاو من لشبونة ب25 مليون يورو ،،

وحصول برشلونة علي %50 ،،

من قيمة بيع لشبونة ترينكاو لأي نادي في المستقبل…

والمرة دي هيدخل ديكو يقولهم :

خدوا ترينكاو حلال عليكم ،،،

وأدي نفس ال40 مليون يورو ،،،

وسيبولنا جيوكيريش ،،،

وبارك الله فيما رزق …

الحل التالت بقي لو أول حلين فشلوا ،،،

يدفع برشلونة ال60 مليون يورو ،،،

ويراهن علي إقناع فليك وديكو لجيوكيريش بمشروع برشلونة المستقبلي..

وعشان تفهم ليه المهاجم ده مجنون ،،،

والموضوع كبير،،،

والخناقة دي دايرة عليه ،،،

وكل القلق ده عمله فيكتور جيوكيريش ،،،

من الموسم اللي فات ،،

وكمل تألق وانفجار في الموسم الحالي ،،،

وسجل مع 66 هدف في 67 مباراة مع لشبونة ،،

ومسجل الموسم الحالي 5 أهداف في 4 مباريات في دوري أبطال أوروبا ،،

آخرهم هاتريك في المان سيتي …

ومش بس كده ،،

ده مسجل كمان 16 هدف في 10 مباريات في الدوري البرتغالي ،،

 

وهدفين في كاس اليانز البرتغالي ،،

عشان يبقي مجموع أهدافه لحد دلوقتي :

23 هدف سجلهم ،،

و 4 أهداف صنعهم ،،

في 17 مباراة ،،

 مع سبورتينج لشبونة في كل المسابقات الموسم الحالي.

قولي لو انت مكان جيوكيريش تعمل ايه ؟؟؟

تروح برشلونة ؟!

ولو روحت برشلونة هتنجح ؟؟

ولو مش برشلونة ،،

هتقبل عرض أي نادي من كل الأندية الكبيرة دي ؟؟

مستنيك تقولي رأيك في الكومنتات

ولو وصلت لحد هنا تبقي من متابعينا الأوفياء ،،

عشان دي نهاية الفيديو ،،

كل اللي عليك تقولي رأيك في الكومنتات ،،

وتعمل لايك و subscribe و share 

وكل اللي علينا فيديوهات جاية أقوي وأحلي بكتييييير..