أموريم مانشستر يونايتد

غير طريقة اللعب و DNA النادي ،،

وحول ملعبه لكابوس لكل الخصوم ،،

وبعد ما اتكسرت هيبته علي مدار 10 سنين فاتوا ،،

صنع فريق الكل بيخافه ويهابه ويعمله ألف حساب ،،

تصدر الدوري وفاز علي غريمه التاريخي في الكلاسيكو..

كلاسيكو ؟؟؟

انت كده بتتكلم عن هانز فليك وبرشلونة ؟؟

بص هو أنا بتكلم عن برشلونة وفليك فعلاً ،،

بس في نفس الوقت بتكلم عن روبين أموريم ،،

المدرب الجديد وقائد المشروع الثوري في مانشستر يونايتد ..

والربط بينهم سببه ؛

إن ظروف برشلونة قبل فليك ،،

هي هي نفس ظروف مانشستر يونايتد قبل أموريم ،،

بل إن ظروف اليونايتد أسوأ بكتير كتير كتير…

عشان كده مدرب المشروع هو الفكرة اللي أقنعت هانز فليك بتدريب برشلونة ،،

وأقنعت كمان روبين أموريم بتدريب مانشستر يونايتد ..

والرابط بينهم كمان إن فليك عمل تأثير إيجابي سريع وفوري ..

ودي الميزة اللي اتشهر بيها روبين أموريم،،

 واللي بسببها تعاقد معاه اليونايتد 

لأنه في أمس الحاجة لتغيير فوري في النتايج والآداء..

والمتوقع للشراكة الجديدة دي ،،

بين الشاب البرتغالي الطموح والنادي الانجليزي العريق ،،

إنها تنجح …

وتكون بداية حقبة جديدة وعصر جديد،،

 في تاريخ كبير مدينة مانشستر وزعيم انجلترا التاريخي ،،

في ملعبه المرعب الاولد ترافورد،،

 المشهور بمسرح الأحلام…

بعد اكتر من 26 سنة درب فيها السير أليكس فيرجسون الجلوري 

المانشستراوي ،،

داق فيهم طعم النجاح واعتلي كل منصات التتويج في كل البطولات ،،

عدي عليه 11 سنة هما الأسوأ والأصعب في تاريخ الشياطين الحمر بعد اعتزال فيرجسون التدريب 

ال11 سنة دول كان فيهم 8 مدربين ،،

كلهم فشلوا فشل ذريع ،،

وجه الدور علي المدرب رقم تسعة ،،

اللي هيكون أصغر مدرب في تاريخ مانشستر يونايتد ،،

عشان يقلب الموازين ،،

ويدخل رهان جديد وحرب جديدة ،،

خصومه فيها هما البيئة الداخلية للنادي ،،

اللي الكل قال عنها إنها سبب فشل كل اللي سبقوه ،،

وخصمه الأصعب هو بناء فرقة قوية ،،

ترجع مانشستر يونايتد لمجده القديم ،،

بحاضر ومستقبل يليقوا بيه وبجمهوره ،،

اللي خلاص طفح بيه الكيل ،،

من كتر المشاكل والصفقات المضروبة

وفضايح الخساير بنتايج كبيرة ،،

والخروج من كل البطولات بدون أي إنجاز…

 والجلايزرز اللي خربوا النادي،،

 قبل ما يسيبوه للسير جيم راتكليف المالك الجديد للمانيو..

مين بقي أموريم اللي ملاك اليونايتد الجداد حطوا ثقتهم فيه ؟؟

هحكيبك كل حاجة بالتفصيل …

بس الأول إعمل لايك و اشترك في القناة 

ده لو لا قدر الله مكنتش لسه مشترك ومفعل زي الجرس 

عشان يوصلك كل فيديوهات محتوانا الفاخر..

روبين فيليبي ماركيز أموريم …

الراجل ده بقي ،،

قبل ما احنا نتكلم عنه ،،،

اتكلمت عنه أرقامه وطريقة لعبه الجذابة الجميلة الممتعة ،،

وإنجازاته اللي عملها في البرتغال،،

 وعملها في وقت قصير جداً ،،

واللي كانت سبب إن كبار أندية أوروبا تطلبه بالإسم ،،،

عشان يكون مدربهم زي ليفربول وويستهام قبل بداية الموسم الحالي ،،

ومانشستر سيتي اللي كان بيفكر فيه يكون خليفة بيب جوارديولا..

وكمان اتكلم عنه الأب الروحي ليه ،،

ومثله الأعلي جوزيه مورينيو ،،

 واللي شجعه علي قبول مهمة تدريب المانيو وقال :

مانشستر يونايتد تعاقد مع أحسن مدرب في البرتغال،،

مدرب قوي ومش بيغير أسلوبه مهما كان المنافس،،

 ومرن بين الدفاع والهجوم…

حتي الفيلسوف بيب جوارديولا اتكلم عنه وقال: 

في الكورة الموهبة أهم من الخبرة والسن ،،

وأموريم مدرب موهوب جداً ،،

وأنا لعبت ضده مرتين،،

 وعجبني فيه إنه بيلعب ضغط عالي وبيهاجم،،

 ومانشستر يونايتد دايماً بيتعاقد مع مدربين كبار وهو مدرب كبير .

وأموريم هو مدرب شاب ناجح وطموح عنده 39 سنة ،،

شخصيته قوية جداً في التعامل مع اللعيبة وإدارات الأندية 

ومع ذلك محبوب من الجميع …

وطريقة لعبه مختلفة عن الطرق اللي بنشوفها مع كل مدربين أوروبا في الدوريات الخمسة الكبري 

طريقة هجومية جذابة وممتعة للعين …

بدأ مسيرته التدريبية اللي عمرها 4 سنين وكام شهر،،

بنجاح بسرعة الصاروخ ..

وأول خطوة علي مستوي الفرق الأولي كانت مع براجا البرتغالي ،،

من ديسمبر 2019 ل مارس 2020

لعب معاهم 13 مباراة 

وفاز معاهم بكأس الرابطة البرتغالية ..

 وبعدها انتقل لسبورتنج لشبونة في شهر مارس 2020

وهو عنده 36 سنة 

وكان لشبونة مغير 5 مدربين في سنتين ،،

وبعد 19 سنة للنادي بدون بطولات ،،

حقق معاهم بطولة الدوري البرتغالي مرتين ،،

وكاس الرابطة البرتغالية مرتين ،،

 وحقق نتايج مفاجأة وعمل ماتشات كبيرة ،،

ضد بورتو وبنفيكا  

ودول كبار القوم في البرتغال.

روبين سايب لشبونة وهو متصدر الدوري ب27 نقطة

بعد 9 ماتشات كسبهم كلهم 

وسجل 30 هدف واستقبل هدفين بس 

ومتأهل مع الفريق لربع نهائي الكاس 

وعنده 7 نقط من أصل 9 نقط في دوري أبطال أوروبا …

وساب كل ده عشان عيون مانشستر يونايتد في قرار جرئ وشجاع جداً منه ….

بس هو مش أشجع ولا أجدع من مانشستر ،،،

عشان اليونايتد دفع 15 مليون يورو لسبورتنج لشبونة لإقناعه بالتخلي عن أموريم واتنين من مساعديه …

وعقد المدرب البرتغالي مع اليونايتد هيمتد لصيف 2027 

وفيه بند تمديد لسنة إضافية ،،

ويبدأ شغله في قيادة الشياطين الحمر أثناء التوقف الدولي الجاي يوم 11 نوفمبر ..

من أهم مميزات أموريم وأسباب شهرته تطوير الشباب ..

ولعب معاه في سبورتنج لشبونة :

نونو مينديز لاعب باريس سان جيرمان 

و ماثيوس نونيز لاعب مانشستر سيتي 

و مانويل اوجارتي لاعب مانشستر يونايتد 

 

و بيدرو بورو لاعب توتنهام 

و بالينيا لاعب بايرن ميونيخ 

وجويكيريس لاعب لشبونة الحالي واللي عليه خناقة بين تشيلسي وارسنال 

 

نيجي لأهم حاجة هنتكلم عنها في كلامنا كله واحنا بنعرفك علي روبين أموريم ،،

وهي طريقة اللعب والتشكيل المتوقع لمانشستر يونايتد مع المدرب الجديد 

الرسم التكتيكي المعتاد للمدرب بيكون 

343 و 3421 و 3412 

وده معناه إنه بيعتمد علي ثلاثي دفاعي في كل الأحوال 

بضغط عالي وأدوار دفاعية للمهاجمين،،

 والاعتماد علي محورين الارتكاز وظهيرين الجنب في الضغط العكسي 

في بداية هجمة الخصم 

وبعدين بيتحول الفريق لطريقة 541 في الحالة الدفاعية 

بانضمام الأظهرة لثلاثي الدفاع  

وتحضير الهجمة والطلوع بالكورة من منطقته بيعتمد فيها علي 

حارس المرمي اللي بينضم لاتنين من المدافعين 

عشان يشكل ثلاثي من الممرين الجيدين 

وهنا دور اونانا مهم جدا جدا في تحضير كل هجمة للفريق ..

وهي طريقة هجومية بيعتمد فيها علي الكور العرضية،،

بعد ما بيطيّر الظهيرين اليمين والشمال اللي ماسكين الخط وفاردين الملعب طول الوقت 

 وانضمام الأجنحة لأنصاف المساحات ،،

وتحول محورين الارتكاز لاتنين عشرات،،

 عشان يضمن الكورة التانية،،

ويطبق الضغط العكسي زي ما قال الكتاب.

التشكيل المتوقع للمانيو مع الكوتش الجديد أموريم 

اونانا في الحراسة 

ليساندرو مارتينيز دي ليخت ليني يورو 

ظهير شمال دييجو دالوت 

ظهير يمين نصير مزراوي

مانويل اوجارتي وكاسيميرو محورين وسط الملعب 

قدامهم ماركوس راشفورد وبرونو فيرنانديز 

تحت المهاجم الوحيد راسموس هويلوند

وهيكون معاه علي الدكة الموهوب جدا كوبي ماينو 

اللي أكيد هيعتمد عليه ويدخله أساسي في التشكيل مكان كاسيميرو،،

جرناتشو وأماد ديالو وميسون ماونت وزيركزي واريكسن 

وماجواير وليندلوف 

كلهم هيكونوا مهمين للمداورة 

خاصة ان الفريق بيلعب في الدوري واليوروباليج وكاس انجلترا 

كبير مدينة مانشستر دلوقتي في المركز ال14 في الدوري برصيد 11 نقطة 

وفي المركز ال21 في اليوروباليج ب3 نقط من 3 مباريات 

بعد ما فشل يفوز في أي مباراة 

المباريات الجاية للشياطين الحمر فيها تحديات كبيرة وصعبة

هيقابل فيها :

تشيلسي و ليستر و ايبسويتش تاون و ايفرتون و ارسنال 

وماتشات علي الورق سهلة في اليوروباليج 

باوك اليوناني وفيكتوريا بلزن 

السؤال المهم دلوقتي هو : 

هل المدرب الجديد هياخد دعم اللعيبة والإدارة والجمهور؟؟

بص 

هو الأكيد إنه هياخد الدعم الكامل من إدارة النادي 

لأنه محسوب عليهم ،،

ونجاحه هينسب ليهم ،،

وفشله من فشلهم ،،

والدعم ده هيكون في صورة صفقات جديدة ،،

وثقة في الراجل تديله الحرية يختار الصفقات الجديدة بالاتفاق مع الإدارة طبعاً ،،

والصبر عليه في حالة تراجع النتايج في أي وقت لأي سبب …

ودعم اللعيبة للمدرب الجديد دي بقي فيها كلام 

يعني ايه الكلام ده ؟؟

يعني اللي دعمهم الكامل الأكيد لأموريم ,,

هما اللعيبة الصغيرة في السن ،،

زي كوبي ماينو وجرناتشو وليني يورو وأماد ديالو وهويلوند

والدعم ده أكيد لأنهم لسه أسماءهم صغيرة وتاريخهم لسه بيبدأ في الكورة 

فدعمهم للمدرب في مصلحتهم

عشان هو كمان يدعمهم ويثق فيهم ويعتمد عليهم أساسيين طول فترته مع النادي 

أما بقي اللعيبة اللي دعمها البرتغالي فيه كلام هما حزبين جوه النادي  

الحزب الأول هو اللعيبة الكبيرة كباتن الفرقة 

ودول زي راشفورد وبرونو فيرنانديز البرتغالي بلديات الكوتش أموريم ولوك شو وهاري ماجواير،،

والحزب ده يعتبر مركز قوة جوه النادي ..

الحزب التاني بقي هما أولاد المرحوم ايريك تين هاج 

اللي هما الصفقات اللي تين هاج شخصياً هو اللي جابهم النادي 

ودول بقي كتير وانت عارفهم كويس 

زي اونانا وانتوني ومالاسيا وليساندرو مارتينيز ودي ليخت ونصير مزراوي وكاسيميرو وميسون ماونت والشهيد اريكسن وزيركزي ..

وده تشكيل عصابي كامل وحزب قوي جوه أوضة لبس مانشستر يونايتد …

ودعمهم للمدرب من عدمه يفرق كتير في نجاح أو فشل تجربة الكوتش الجديد..

الخلاصة إن أموريم مدرب طموح ومشهودله بالكفاءة وهو مدرب مشروع طويل الأمد،،

وهيحتاج لعيبة مناسبين لتكتيكاته ومثاليين لتطبيق أفكاره،،

ودول يتلخصوا في 4 مراكز ،،

الظهيرين الهجوميين ،،

والجناحين اليمين والشمال ،،

وبنسبة كبيرة في يناير هيدعم الفريق بصفقات جديدة..

عايزك تقولي في الكومنتات،،

 الصفقات المناسبة لمانشستر يونايتد،،

 اللي هيحتاحها المدرب الجديد عشان ينجح ..

وكمان تقولي اللعيبة اللي كفاية عليها كده،،

 ولازم المانيو يتخلص منهم..

 

لو وصلت لحد هنا تبقي من متابعينا الأوفياء 

عشان دي نهاية الفيديو 

كل اللي عليك تقولي رأيك في الكومنتات وتعمل لايك و subscribe و share 

وكل اللي علينا فيديوهات جاية أقوي وأحلي بكتييييير