التحليل الكروي

مش محتاج تلبس بدلة وكرافتة ،،

وتتفرج علي الماتش 3 مرات،،

 عشان تقطع لقطات وتحللها.. 

 ولا ترسم خطوط ولا كاميرا في أعلي نقطة في الملعب ولا محمد سعدون الكواري يقدمك ويقول قبل إسمك الكابتن ...

الموضوع بسيط  

الشروط 

لازم تكون متابع جيد لفيديوهات ستيب سبورت 

عندك شغف بالكورة لدرجة الجنون  

عندك 10 دقايق من وقتك تتفرج علي الفيديو ده 

وأهم شرط تعمل لايك و شير وكومنت ولو عجبك الفيديو 

في البداية محتاج تعرف إن المحللين مقسومين لنوعين ملهومش تالت 

نوع موهوب بالفطرة ودماغه معجونه كورة وبينام يحلم بيها ومزاجه وحياته معتمدين علي ماتش ممتع يظبطله موده أو خسارة فريقه المفضل تعكنن عليه 

النوع التاني هو اللي درس التدريب وتدرج في الحصول علي الرخص التدريبية أو كان لاعب سابق أو حتي اخد كورس اونلاين 

احنا بقي هنختصر عليك كل المشوار ده 

ولا هتحتاج تدرس التدريب ولا تدفع مئات الدولارات للحصول علي كورس للتخصص في التحليل الفني 

احنا هنا هنتعلم ازاي نتفرج علي الماتش بعين المحلل المحترف وهنقدملك خلاصة خبرات محللينا المحترفين ومع الوقت هتبقي محلل محترف بجد

في البداية اول خطأ للمشاهد الهاوي هو إنه بيبص علي الكورة واللاعب اللي معاه الكورة فقط 

وده نفس المشاهد اللي ممكن يقول علي ريال مدريد فريق ضعيف لو دافع قدام مانشستر سيتي وعلي ايبسويتش تاون فريق قوي لو لعب ضغط عالي علي ليفربول 

ده تسيبك منه خالص وتدعيله ربنا ينور بصيرته عشان الكلام معاه تضييع وقت وأنا بصراحة مجوزوش أختي 

كده انت فهمت إن الصح انك تبص علي الفريق اللي مش معاه الكورة وتتابع تحركات لعيبته 

وده ياخدنا لمراحل اللعب الأساسية في الكورة 

الدفاع والهجوم والتحول من الدفاع للهجوم والتحول من الهجوم للدفاع وده كلام بسيط جدا وسهل تفهمه 

ابسطهالك هبسطهالك حاضر حاضر 

يعني فريق الكورة في كل أوقات الماتش يا إما معاه الكورة يا إما الكورة مع الفريق المنافس 

سهلة ؟ سهلة جدا 

الفريق وهو معاه الكورة بيبدأ الهجمة ازاي ؟

كور طويلة ولا تمريرات كتيرة ولا بيطلع من علي الاجناب ولا بيطلع من العمق ؟

دي مرحلة التحول من الدفاع للهجوم اللي بتتطور بعد كده لمرحلة الهجوم 

كده دول مرحلتين 

الفرقة اللي معاها الكورة وبتهاجم دي اتقطعت منها الكورة والكورة دلوقتي مع الفريق المنافس 

الفريق بقي بيقف ازاي ويتحول من الهجوم للدفاع ؟

بيكمل ضغط عالي ولا بيقف بكل لعيبته تحت خط الكورة بضغط من تلتين الملعب وده اللي بيقولوا عليه medium block ولا بيركن الاتوبيس وبيدافع من آخر تلت في الملعب اللي بيقولوا عليه low block 

ودول بقي المرحلتين التانيين 

الفريق اتحول من الهجوم للدفاع وبعدين بقي في حالة دفاع   

كل ده كلام جميل وسهل ومفيش فيه أي حاجة صعبة 

خلصنا النظري ؟

يلا بييييييينا نطبق الكلام ده عملي 

جرب معايا مع أول متابعة ليك الماتش الجاي

تركز مع وقفة الفرقة اللي مش معاها الكورة وتشوف المدرب بتاعهم موقفهم ازاي 

ساعتها بس هتحس انك كنت مع المدرب واللعيبة في اوضة اللبس ومحاضرة الماتش وسامع المدرب قالهم يقفوا ازاي ويتحركوا ازاي والكورة مش معاهم 

وبعدين تخطف عينك وتبص علي الفريق اللي معاه الكورة 

وهتلاحظ الفريق بيباصي كتير بالعرض زي ليفربول سلوت ولا بيلعب لعب مباشر ويباصي لقدام زي ليفربول كلوب بيحضر الهجمة ب3 مدافعين ولا 4

لعيبة وسط الملعب واحد منهم واقف قدام الدفاع single pivot زي مانشستر سيتي الموسم الحالي 

ولا اتنين وقدامهم اتنين عاملين box midfield زي مانشستر سيتي الموسم الماضي

اعمل حسابك هنقول مانشستر سيتي كتير عشان الجديد كله بيطلع من عند جوارديولا بابا الشغلانة

الباكات بتتقدم زي ليفربول ولا منهم باك بيدخل قلب الملعب زي ارسنال 

مع الوقت هتشوف الماتش بشكل تاني وهتشوف حاجات عمرك ما ركزت معاها ولا اخدت بالك منها وهتفهم طريقة لعب كل فريق وتفكير كل مدرب والهدف من كل تغيير 

مش بس كده 

ده انت مع الوقت والخبرة هيكون ليك رأي في الماتش وتقدر تتوقع نتيجته من أول ما تشوف التشكيل وكمان هتعدل علي المدرب وتقوله التغيير ده غلط والتغيير ده صح 

في الوقت ده هتحس زي ما يكون كنت أعمي وفتحت أو تعبان وارتحت والادرينالين يطلع يضرب في سقف دماغك وهتحس متعة غير طبيعية 

وعشان تختبر نفسك 

تابع الاستوديو التحليلي بين الشوطين أو بعد الماتش

وبعد ما تسمع دكتور طارق الجلاهمة بيقول جملته الخالدة هذا ما تكلمنا عنه قبل المباراة وأبو تريكة بيقطع في تشيلسي كالعادة

هتلاقيهم بيوصفوا الماتش والحالات زي ما انت شوفتها بالظبط 

وساعتها هتتكشف قدام عينيك محللين كتير أنهم قد ايه فاهمين ومثقفين وكلامهم عن وعي 

ومحللين تانيين انا بسميهم المحظوظين في الأرض 

محظوظين لأنهم معنهدهمش فكرة ولا حتي أساسيات وبديهيات التحليل الكروي واعتمادهم بس علي أسمائهم وشهرتهم ونجوميتهم 

بس في كل الأحوال اول ما تسمع المحلل بينطق جملة بشكل كبير جداً اقفل التليفزيون علي طول 

عشان ده واحد من المحظوظين في الأرض اللي قولتلك عليهم 

ولو عايز تتعلم التحليل أسرع ؟؟

تابع فيديوهات ستيب سبورت طبعاً 

عشان هتلاقي تحليلات مفصلة لماتشات كتير

وتقدر تحلل الماتشات دي مع محللينا 

وتبعتلنا تحليك في الكومنتات وتشاركنا رأيك في كل فيديو 

كمان تقدر تقرأ كتب عن الكورة 

هتكون مفيدة ليك جدااااا

زي كتاب 

كيف تشاهد كرة القدم 

للأسطورة رود خوليت 

وكتاب أنا أفكر قبل أن ألعب 

للأسطورة الإيطالي اندريا بيرلو 

وكتاب القيادة 

لطيب الذكر الكبير السير أليكس فيرجسون 

وكتب تانية كتير هتفيدك وتغير رؤيتك للكورة 

ومهم جداً كمان تتابع ماتشات كورة علي قد ما تقدر 

ودي انت كده كده هتعملها من غير ما أقولك 

عشان انت أكيد شبهي وشبه كل مجانين الكورة 

اللي الشغف مسيطر عليهم 

ولما تندهه النداهة

لازم يلبي الندا 

ولو تحب تتعلم بجد 

تابع محللين زي أحمد عفيفي أحمد عزالدين أحمد حسام ميدو خالد بيومي حاتم الطرابلسي نبيل معلول خالد شنيف طارق دياب.

الفيديوهات الجاية هنتعمق اكتر في مصطلحات كروية 

انت اكيد بتسمعها في التلفزيون من محللين محترفين بيظهروا علي القنوات 

هشرحلك وافسرلك كل مصطلح وكل كلمة منهم 

ومع بعض لحد ما تبقي زيك زيهم ومع الوقت هتبقي أشطر منهم كمان 

ومين عارف يا كابتن 

ممكن في يوم من الأيام نشوف شباب أو بنات من متابعين ستيب سبورت المخلصين واحد من نجوم التحليل في الوطن العربي أو ينضم لكتيبة محللينا المحترفين في ستيب سبورت 

كل المطلوب منك تتابع فيديوهاتنا 

ولو عندك أي أسئلة اكتبها في الكومنتات