ركنيات أرسنال

سجل آخر 3 أهداف ليه في البريميرليج من ضربات ركنية !!

غريبة صح ؟؟

طيب لو قولتلك إنه سجل 23 هدف في الدوري الانجليزي من الموسم اللي فات ولحد دلوقتي 

ده مش هالاند ولا ايزاك ولا محمد صلاح ولا بالمر 

ده نيكولاس جوفر 

اللي مجنن ومحير العالم كله 

ولو متعرفوش… تعالي وهعرفك علي الراجل اللي راكب التريند وراكب كل دفاعات فرق البريميرليج 

هقولك ايه الحكاية و إيه أسرار وتفاصيل القصة  

بس الأول إعمل لايك و share و اشترك في القناة  

ده لو مكنتش لسه مشترك ومفعل زر الجرس 

عشان يوصلك كل فيديوهات ومحتوي ستيب سبورت الفاخر..

عمرك شفت جمهور فريق بيحتفل بحصول فريقه علي ضربة ركنية اكتر من احتفالهم بحصول الفريق علي ضربة جزاء !!!؟

طيب عمرك شفت محللين ولعيبة سابقين واستديوهات اكبر القنوات الرياضية في العالم عاملين تحليلات ونقاشات مفتوحة عن موضوع واحد 

وهو ازاي نوقف السلاح الجديد الفتاك بتاع الضربات الركنية لأرسنال 

دلوقتي أحدث موضة في الكورة 

وحديث العالم كله 

عن ازاي ارسنال بيلعب ضرباته الركنية 

والأهم هو التفكير في طريقة لإيقافها وإبطال مفعولها 

لو كنت فاكر إن فيه مبالغة في الموضوع 

أحب اقولك إنه من موسم 2021 

ارسنال خطف من مانشستر سيتي جوهرة وكنز لا يقدر بثمن 

وهو الألماني ابن الألماني نيكولاس جوفر مدرب الكرات الثابتة في ارسنال اللي بيسجل اهداف من الدكة 

وأول ما تشوف ديكلان رايس بيرفع ايده الشمال وهو بيلعب الكورنر

وكل لعيبة ارسنال واقفين جوه ال18 

ومتمركزين بره حدود العارضة والقائمين

وهافرتز بيجري علي القريبة 

ووراه جابرييل ،،، وساليبا واقف جوه ال6 ياردة بيحجز علي حارس المرمي 

ومارتينلي واقف مستني الكورة التانية 

وفجأة وفي لمح البصر وقبل ما تلحق تستوعب اللي حصل 

هتلاقي الكورة في الشبكة 

وتفتكر إنك كده خلاص فهمت التريكاية بتاعتهم وهتتوقع اللي هيحصل في الكورنر اللي بعده 

هتلاقي ساكا من الناحية التانية بيرفع ايده بردو 

وبمناسبة ساكا اللي هو أكتر لاعب عمل أسيستات الموسم الحالي في الدوري

ده وقت سؤال الحلقة 

اللي كالعادة ميعرفش إجابته غير المتابعين المحترفين بس

وقف الفيديو لحظة 

وجاوب السؤال في الكومنتات 

كام هدف صنعهم ساكا عشان يبقي متصدر ترتيب صناع الأهداف في البريميرليج حتي الآن بعد 15 ماتش لأرسنال ؟؟؟؟

وبعد ما رفع ايده البوكايو ساكا

وكل لعيبة الجانرز واقفين بره المرمي 

وكل واحد منهم بيدور علي مساحة بين لعيبة الخصم 

وأهم اتنين 

لاعب مع حارس المرمى 

ولاعب مع لاعب الخصم اللي علي القايم القريب 

عشان يمنعه ينط ياخد الكورة بدماغه 

وتعدي لزمايله 

واتنين لعيبة واقفين علي خط ال18 

مستنيين الكورة التانية تترد من الخصم

وبردو فجأة تلاقي الكورة في الشبكة والفريق اللي بيلاعب ارسنال بيسنتر

وبعد ما اتكلمنا ازاي بيلعبوها 

هنتكلم دلوقتي عن المحاولات البائسة للمدربين اللي حاولوا يبطلوا مفعول ركنيات ارسنال 

وحاولوا يلاقوا ليها حلول 

آخرهم كان الحاج أبو ريم مدرب مانشستر يونايتد 

لما وقف لعيب طويل زي هويلوند علي القايم القريب 

وقدامه برونو فيرنانديز 

عشان يمنعوا الكورة إنها تعدي 

ووقف كل مدافعينه الطوال زي ماجواير ودي ليخت جوه منطقة الذ6 ياردة 

وخلي ماونت مكلف بإبعاد ويليام ساليبا المسؤول عن مضايقة حارس المرمى اونانا وعزله وإبعاده عن الكورة 

ومش بس كده 

ده كمان كلف اتنين لعيبة 

اللي هما آماد ديالو وجرناتشو 

إنهم يقفوا قدام الاتنين لعيبة اللي موقفهم جوفر علي خط ال18 عشان يستنوا الكورة التانية 

لكن كل الكلام ده طلع في الآخر بلح بالكنتالوب

وأبو ريم لبس بدل الكورنر اتنين 

عشان يخسر الماتش 0-2 

من ضربتين ركنيتين 

وآخر الضحايا كان ماركو سيلفا مدرب فولهام 

اللي هو كمان حاول يحط التاتش بتاعه 

وفكر في حلين لإيقاف ركنيات الجانرز

وهما استخدام دفاع المنطقة وحماية المساحة وكل الأماكن الخطيرة وتقسيم منطقة جزاؤه لمربعات صغيرة 

كل لاعب فيها بيكون مسؤول عن مربع لحمايته 

والحل التاني كان في المجانص والترابيس والباي والتراي والعضلات اللي غير مخ 

اداما تراوري عشان يحجز علي ساليبا 

اللي خلاص عرفنا إن دوره هو عزل حارس المرمى عن اللعب 

وكل حاجة مشيت صح 

واللعيبة راقبت المساحات صح 

واداما تراوري زغد ساليبا في كليته 

لكن نسي تراوري يكمل اللعبة للآخر 

وساب ساليبا 

وبردو سجل ارسنال هدف التعادل من ضربة ركنية 

وعلي سبيل الحنيكة ،، وحنيكة جاية من التحنيك ،، والصفة منها محنك 

اقترح الأسطورة ديدييه دروجبا حل لإيقاف ركنيات ارسنال 

ثم تنهد وقال : ضع شخص على بعد 10 امتار من منفذ الركنية، وأطلب منه القفز حتى يؤثر على منفذ الركلة ويمنعه من رفع كرة جيدة، ثم ستطلب من حارس المرمى أخذ جميع الكرات العالية، مع توفير الحماية الكاملة له بواسطة المدافعين.

اللي ايده في المايه يا عم دروجبا 

والكلام سهل ورخيص

وحتي كاراجير وجاري نيفيل 

اجتهدوا واقترحوا حلول لركنيات المدفعجية 

كان نفع نفسه يا جاري بيه نيفيل 

فريقك لسه لابس جونين من ركنيتين في آخر ماتش مع ارسنال 

ملوك الركنيات هو الإسم الجديد لارسنال النادي اللندني العريق 

 و أغنية "ركلة ثابتة مرة أخرى، أولي، أولي، أولي" تتردد في أرجاء ملعب الإمارات مع كل ضربة ركنية للفريق

وحقك يا ارسنال ووضعك يسمحلك 

بعد ما بقيت اكتر فريق يسجل اهداف من ضربات ركنية في الدوريات الخمسة الكبري ب23 هدف 

 و سجل الفريق من وقت ما انضم جوفر 48 هدف من الضربات الركنية، أكتر من أي فريق في إنجلترا بفارق كبيييييييير..

وبقت كل جماهير ارسنال بتحتفل وتغني مع كل ضربة ركنية للفريق وتبقي نفس اللحظة هي فيلم رعب علي المنافسين

المنافسين اللي كلهم بلا استثناء فشلوا في التصدي للسلاح الفتاك الجديد

اللي كل فريق ومدرب بيلاعب ارسنال بيقعد يتكتك ويمخمخ ويفكر هيوقفهم ازاي ؟؟

ولحد دلوقتي لم ينجح أحد..

وانت بقي يا أبو الكباتن جه دورك عشان تشغل دماغك اللي معجونة كورة وتحاول تلاقي حل لأحدث موضة في الكورة العالمية

وعايزك تقولي رأيك في الكومنتات 

ايه هي الحلول لإيقاف ركنيات ارسنال ؟؟

ومين هو الفريق القادر علي إبقاف السلاح الفتاك للجانرز وهو الضربات الركنية ؟؟؟

ولو وصلت لحد هنا تبقي من متابعينا الأوفياء ،،

عشان دي نهاية الفيديو ،،

كل اللي عليك تقولي رأيك في الكومنتات ،،

وتعمل لايك و subscribe و share 

وكل اللي علينا فيديوهات جاية أقوي وأحلي بكتييييير