ريال مدريد وبداية السنوات العجاف

موسم 2024 - 2025 

هو بداية السنوات العجاف 

بعد سنوات سمان كتيييييير لكبير القوم وعم العالم وبطل الأبطال ريال مدريد 

صديقي وكابتني وعم عيالي مشجع أعظم عظيم الميرنجي ريال مدريد 

انت أكيد عمرك ما فكرت إن النهاردة فلورنتينو بيريز عمره 77 سنة 

فلورنتينو بيريز يعني مرجان أحمد مرجان يعني صاحب أول وأكبر كل حاجة سيادتك 

 راجل محقق 36 بطولة يعني مقفل اللعبة ومهكر الماضي والحاضر والمستقبل 

منهم 7 دوري إسباني و 7 دوري أبطال وبطولات تانية كتيييييير زي كأس العالم للأندية والسوبر الأوروبي والسوبر الإسباني وتشكيلة كؤوس ودروع بطولات تخلي إسم ريال مدريد محفور علي كل منصات التتويج 

رجل اعمال ناجح خلي إسم ريال مدريد يلمس السحاب فوق سقف العالم في 6 ولايات رئاسية علي عرش المرينجي 

كل ده كويس وكلام عظيم 

بس لاحظ اني قولتلك إن طال عمره بيريز عنده 77 سنة 

ودي أول مشكلة وهي إن السن ليه أحكام 

والعمر هنا مش مجرد رقم 

هنا الوقت والمكان المناسبين للجملة الخالدة الجسد لا يرحم 

يعني الموضوع مجرد وقت

خاصة إن ولاية بيريز الحالية تنتهي رسميا 2025 

يعني سنة واحدة والعظيم فلورنتينو بيريز ممكن يتقاعد من العمل العام 

 ورئاسة ريال مدريد وياخد فرصة إنه يرتاح شوية 

بيريز صاحب براءة اختراع الجلاكتيكوس سنة 2000 

وبدأ الجلاكتيكوس بصفقة تاريخية وهي صفقة لويس فيجو أحسن لاعب في العالم وقتها ومن مين ؟ من برشلونة الجار اللدود والمنافس الوحيد والخصم العنيد برشلونة 

وبصفقة قياسية 62 مليون يورو وده كان رقم فلكي وقتها 

ومش بس كده

ده كمان جاب مع فيجو زين الدين زيدان 2001 ب77 مليون يورو 

ورونالدو الظاهرة 2002 وديفيد بيكهام 2003 ومايكل أوين 2004 

وسيرجيو راموس وروبينيو 2005 كل دول انضموا لفريق كان موجود فيه أصلا روبيرتو كارلوس وجوتي و راؤول جونزاليس 

وبعدها استقال الزعيم بيريز 2006 

وخلانا نرتاح 3 سنين بس ناخد نفسنا 

وهوب دوبل كيك رجع تاني 2009 بجلاكتيكوس جديد وقام جايب مين بقي خد عندك برنس العالم كريستيانو رونالدو و سيد الناس كاكا والأستاذ الدكتور تشابي الونسو والرئيس حبيب قلب عمه بيريز كريم بنزيما 

و مسعود اوزيل و دي ماريا 2010 وايسكو ومودريتش والبشمهندس توني كروس وهازارد وخد عندك لحد بيلنجهام ومبابي عمل احلي كارير مود 

يعني انت كمشجع ريال مدريد مش محروم من أي حاجة 

ده كمان أول رئيس نادي في تاريخ الكورة يحقق أرباح للنادي تفوق المليار يورو

وفي عهده هيكون ريال مدريد أول نادي في التاريخ هينافس في سبع بطولات في موسم واحد 

وهما دوري الأبطال البطولة المعشوقة الأولي والأخيرة والدوري الاسباني وكاس العالم للأندية وكاس السوبر الاسباني وكاس السوبر الاوروبي وكاس ملك اسبانيا 

يعني المشجع المدريدي البار هيطالب بالسباعية مش السداسية

فكر معايا كده 

مين غير فلورنتينو بيريز يقدر يعمل كل ده ؟

مع إني عارف الإجابة بس عايزك انت تجاوبني في الكومنتات !

نيجي بقي للمشكلة التانية اللي صعوبتها متقلش صعوبة عن المشكلة الأولي 

كارلو أنشيلوتي يعني مستر فيتو كورليوني المافيا الكبير يعني 14 بطولة يعني أكتر مدرب حقق بطولات في تاريخ ريال مدريد 

الراجل الوحيد اللي بيعمل من الفسيخ شربات ومش بيطلب صفقات وبيشتغل تحت أي ظروف وعقبات وبيعرف يكسب بأي تشكيل مهما كانت الإصابات 

كارلو أنشيلوتي النهاردة عمره 65 سنة 

وده في عمر التدريب سن كبير جداً 

يعني أنشيلوتي هو كمان قدامه بالكتير موسم أو اتنين ويعتزل التدريب بحكم السن وبحكم إن هو كمان قفل اللعبة وحقق كل حاجة في الكورة 

اللي بنتكلم عنه النهاردة هو اليوم اللي هيمشي فيه كارلو أنشيلوتي 

مين يصلح مدرب لريال مدريد ؟؟

هسمع واحد بيقول يورجن كلوب مثلا !

هقولك مدرب عظيم وعبقري لكن لا يصلح لريال مدريد 

ليه ؟

تفتكر فينيسيوس جونيور ومبابي ورودريجو هيضغطوا ضغط عالي ويرجعوا يدافعوا مع الفرقة زي ماني وصلاح وفيرمينو مع كلوب في ريال مدريد ؟

الإجابة لأ طبعا مستحيل 

طيب يورجن كلوب ممكن يغير تفكيره وطرق لعبه عشان تكون مناسبة للعيبة دي ؟

الإجابة لأ طبعا مستحيل تاني 

ده ألماني يعني في الجري والبدني والضغط العالي معندوش يا أما ارحميني 

وساعتها هتقول ولا يوم من أيامك يا خال كارلو أنشيلوتي 

وقتها ريال مدريد هيجرب يقنع زين الدين زيدان بالعودة للحبيب الأولي بس تفتكر زيدان يقدر يكرر نجاحه الأسطوري ؟

والمرحلة اللي بعدها هيفضل مدريد يجرب في مدربين عالميين بأسماء كبيرة ومفيش حد فيهم هيوصل لنص نجاحات أنشيلوتي 

والمرحلة اللي بعدها هيجرب مدربين شباب من اولاد النادي 

أملا في تكرار التجربة الناجحة لزين الدين زيدان 

لحد ما حد فيهم الكيميا بتاعته تظبط مع الإدارة واللعيبة والجمهور ويقدر ينجح 

انت دلوقتي اكيد بتفكر في السكواد العالمي اللي كله شباب من خيرة لاعبي العالم 

فينيسيوس ومبابي وفالفيردي ورودريجو الفما حاجة وايندريك واردا جولير وتشاوميني وكامافينجا وميليتاو

وتقولي ده كمان احسن باك يمين في العالم ترينت الكسندر ارنولد جاي free الموسم الجاي 

وأحسن باك شمال في العالم الفونسو ديفيز جاي هو كمان

 free الموسم الجاي مع اخوه ارنولد 

وهنكسح أي حد وكله هيتحاسب واللي هيتعادل معانا يبقي بطل 

هقولك كل ده علي راسي من فوق وعداك العيب 

بس فكر فيها السكواد القوي ده عامل زي العربية الفيراري ال1000 حصان

محتاج أمهر سواق في العالم عشان يعرف يسيطر علي القوة الرهيبة دي ويروض ال1000 حصان دول ويطلع منهم أحسن نتيجة 

ولنا في باريس سان جيرمان عبرة 

فرقة فيها ميسي ونيمار ومبابي وماركينيوس وفيراتي وأكبر انجازاتها كانت الدوري الفرنسي وكاس فرنسا 

واحنا هنا مش بنقارن الميرنجي بباريس يا كابتن 

احنا بس بنضرب مثل نستشهد بيه علي إن الأسماء الكبيرة للعيبة مش هي أهم حاجة في الكورة 

أهم حاجتين هما الإدارة والمدرب 

وهما دول محور كلامنا النهاردة 

بص حواليك لكل أندية العالم 

هتلاقي قاعدة واحدة مش بتتغير وهي إن الكبير يمرض ولا يموت 

يعني مفيش نادي بيفضل ناجح طول الوقت والطبيعي كل الأندية الكبيرة بتمر بمرحلة فراغ وتغيير اجيال وإحلال وتجديد

شوف اي سي ميلان في أوائل الالفينات كان فين والنهاردة فين 

شوف برشلونة 2008 و 2011 كان فين والنهاردة فين 

شوف مانشستر يونايتد مع طيب الذكر السير أليكس فيرجسون كان فين والنهاردة فين 

وتشيلسي مع ابراموفيتش ومورينيو وتوخيل 

وارسنال مع ارسين فينجر

الخلاصة 

لعبة ال one man show اللي لعبها فلورنتينو بيريز وهي إن يبقي هو المتحكم في كل شئ داخل النادي من تعاقدات وعقود رعاية وتطوير الاستاد والمنشآت وكل حاجة 

بتفكرنا بمانشستر يونايتد لما كان السير أليكس فيرجسون هو المتحكم في كل مفاتيح وأختام مانشستر يونايتد وكان هو اللي بيدرب وبيدير وبيتعاقد وبيعمل كل حاجة في اليونايتد 

ومن بعده النادي تاه ووقع في حفرة مش عارف يطلع منها لحد النهاردة 

وده لأن النادي مكنش مجهز كوادر تشيل النادي من بعده في التدريب وفي الإدارة كمان 

طب تعرف أي حد في الكادر الإداري لريال مدريد غير فلورنتينو بيريز ؟

تعرف هيبقي ايه الحل لو فلورنتينو بيريز بكرة الصبح مبقاش موجود ؟

اذا علي ريال مدريد الحذر كل الحذر من الأيام والشهور والسنين والمواسم الجاية 

والشغل علي تجهيز بديل فلورنتينو بيريز يكون شارب الصنعة منه ويدير بطريقته ويشتغل بحرفيته 

وكمان تجهيز بديل لكارلو أنشيلوتي يكون مناسب لطموح وإسم النادي وعنده أفكار مناسبة لنوعية اللعيبة الموجودة في ريال مدريد 

مشجع ريال مدريد بقي عدم فوزه بدوري الأبطال كل موسم هو فشل وانتكاسه 

ومش هيكتفي أبدا بمجرد الفوز بالدوري 

وحقك يا كابتن عشان انت متربي علي العز 

تحلم بالدوري والكاس والأبطال وكاس العالم والسداسية كل موسم 

إذا انت دلوقتي هتسمتع بريال مدريد المرحلة الحالية 

بس بعد كده قدامك حلين أحلاهما مر 

إما تجهز البدلاء المناسبين لبيريز وانشيلوتي 

يا إما هتصرف مليارات في التعاقد مع لاعبين ومدربين لحد ما تعدي فترة السنين العجاف ويطلع فلورنتينو بيريز جديد وانشيلوتي جديد

الكبير كبير وهيفضل كبير وريال مدريد أكبر كبير 

مهما اللي حواليه عملوا صفقات وصرفوا ملايين وضربوا فيتامين 

دايما ريال مدريد رافعلهم شعار إوعي الفيتامين ينسيكوا احنا مين