تحليل ديربي مانشستر

كابتني واخويا وصحبي وعم عيالي 

اللي بستناه في الديربيات والماتشات الكبيرة 

والنهاردة مش بس ماتش كبير 

ده ديربي مانشستر يا معلم 

يعني المتعة مضمونة 

ساعتين من وقتك فيهم قمة المتعة والحماس ونااااااار من جنون البريميرليج 

وأنا بحذرك أهو ،، ايوه بحذرك تاني .. هقولك بحذرك من ايه 

بس الأول إعمل لايك و share و اشترك في القناة  

ده لو مكنتش لسه مشترك ومفعل زر الجرس 

عشان يوصلك كل فيديوهات ومحتوي ستيب سبورت الفاخر..

تعالي متخافش .. الحذر من ايه بقي ؟؟

من حاجتين … أول حاجة

هي تصريحات أبو ريم وجوارديولا 

إوعي تصدق التنويم المغناطيسي بتاع بيب

و مانشستر يونايتد العراقة وفخامة الإسم تكفي وفرقة منظمة وصعب نتوقعهم وبتاع 

ولا أبو ريم في البوقين بتوع السيتي أقوي فرقة في العالم وأحسن مدرب في العالم ولازم نحترمهم واحنا الطرف الأضعف 

لا يا حبيبي … ده كلام إعلام … وحرب نفسية 

سيبك منهم …. كل مدرب من جواه هيموت ويكسب 

وأبو ريم لسان حاله بيقول دي فرصتي والسيتي مش في أحسن حالاته ولازم أصيده وأكسبه وهو في الغيبوبة دي وأبدأ نجاحاتي مع اليونايتد علي قفا جوارديولا 

والبيب بيقول أبو ريم ابن امبارح مين ده اللي يكسبني في الديربي 

ده لسه واكلني اربعة سبانكات بسبورتنج لشبونة في الأبطال 

ولازم اعرفه مقامه وآخد تاري

الحاجة التانية اللي بحذرك منها…. هي انك تفوت الماتش ده 

ولا تقولي السيتي مش شايف وبيخسر من طوب الأرض ،، واليونايتد هو كمان واقع وبيخسر من اللي يسوي واللي ميسواش

لا يا عم الناس …. ده الماتش ده تحديداً 

هيبقي نقطة تحول وحجر زاوية لمسار الفرقتين الموسم ده 

يا إما السيتي هيفوق ويرجع ينافس تاني علي الدوري ويعوض النقط اللي وقعت منه في تعادلات وخسائر

يا إما يكمل تعثرات ويبعد عن المنافسة أكتر وأكتر 

واليونايتد إما تبقي البداية الحقيقية للمدرب الجديد بالشكل الجديد والفكر الجديد وأساس يبني عليه ويبدأ يرجع هيبة اليونايتد 

يا إما ينسي الموسم ده ويفكر في الموسم الجاي 

انت حاسس إني ناسي حاجة والفيديو فيه حتة ناقصة صح ؟؟

لا متقلقش … أنا فاكرك مش ناسيك 

سؤال النهاردة .. الخاص بالخبراء والمحنكين والمحترفين في البريميرليج والكورة العالمية عموماً 

السؤال بيقول :

مين هو هداف البريميرليج الموسم الحالي لحد دلوقتي وسجل كام هدف؟؟

ومين هو أكتر لاعب صنع أهداف وعمل أسيستات

 لحد دلوقتي بعد 15 ماتش وصنع كام هدف ؟؟

يلا وقف الفيديو لحظة ووريني شطارتك وجاوب في الكومنتات ..

يلا بينا ندخل في الأجواء ونبدأ بالتشكيلات المتوقعة 

مانشستر سيتي صاحب الأرض في ملعب الاتحاد 

تشكيله المتوقع هيكون 

ايدرسون البرازيلي في حراسة المرمى 

قدامه من الشمال لليمين 

جفارديول روبين دياز كايل ووكر

وقدامهم كوفاسيتش وكيفين دي بروين وبيرناردو سيلفا 

ووينج يمين البرازيلي الأشول الحريف سافينيو 

ووينج شمال فيل فودين ،،،،، وراس الغول ايرلينج هالاند 

طبعاً دول عشرة لعيبة مش 11 

واللعيب الناقص ده هو ريكو لويس الموقوف المباراة دي بعد حصوله علي كارت أحمر في مباراة كريستال بالاس 

وجوارديولا معندوش ستونز ولا اكانجي ولا ناثان اكي لأن كلهم بعيد عنك مصابين 

ومفيش قدامه غير إنه يعتمد علي جوندوجان أو ماثيوس نونيز جنب كوفاسيتش في وسط الملعب كبديل لريكو الموقوف

أو يدخل فودين في قلب الملعب جنب دي بروين وبيرناردو ويزود دوكو في الوينج الشمال 

وهيبقي معاه علي الدكة جاك جريليش وشوية لعيبة شباب مش هيصنعوا أي فارق وبنسبة كبيرة داخلين التشكيل كمالة عدد بس ومحدش منهم هينزل الملعب

والناحية التانية مانشستر يونايتد الفريق الضيف 

تشكيله المتوقع هيكون 

الكاميروني اونانا حارس مرمى 

من الشمال لليمين ثلاثي الدفاع 

ليساندرو مارتينيز ماتياس دي ليخت والمغربي نصير مزراوي 

وينج يمين المتألق بشدة آماد ديالو ووينج شمال دالوت 

ووسط الملعب مانويل اوجارتي وجنبه الكابيتانو برونو فيرنانديز 

والهجوم ماركوس راشفورد ومايسون ماونت

 تحت المهاجم الدنماركي راسموس هويلوند.ظ

والمصابين عند مانشستر يونايتد طبعاً لوك شو ده شئ بديهي يعني

وليندلوف وايفانز 

وهيكون عنده علي الدكة هاري ماجواير وكاسيميرو واريكسن ومالاسيا وماينو وزيركزي وجرناتشو ..

وعلي مستوي الصفارة ،،، حكم المباريات الكبرى والديربيات والقمم النارية ،،،. انتوني تايلور هو وصفارته هيكونوا موجودين يوم الأحد 15 ديسمبر الساعة 6 ونص في ملعب الاتحاد في قمة الجولة ال16 من البريميرليج ..

وقبل الجولة ال16 

مانشستر يونايتد ترتيبه في جدول الدوري هو ال13 

برصيد 19 نقطة من 15 مباراة 

كسب 5 مباريات واتعادل في 4 وخسر 6 

وفي آخر مباراتين ليه في الدوري خسر من ارسنال 0-2 

وخسر من برينتفورد 

والسيتي في المركز الرابع برصيد 27 نقطة من 15 مباراة 

كسب 8 مباريات واتعادل في 3 وخسر 4 

وفي آخر مباراتين ليه في الدوري كسب نوتنجهام فورست 0-3

واتعادل مع كريستال بالاس 2-2

التوقعات والتحليلات كلها بتقول إن مانشستر سيتي هيدخل الماتش وهدفه الوحيد هو الفوز …

والفوز ده بالنسباله هو الطريق الوحيد لتعويض أربع خسائر و 3 تعادلات ضيع فيهم نقط وبسببهم بقي في المركز الرابع ب27 نقطة 

وبفارق 8 نقط عن المتصدر ليفربول اللي لسه عنده ماتش مؤجل.

والرغبة في الفوز دي هتخلي سيتي جوارديولا بادئ ضاغط برتم سريع لمحاولة ضمان ال3 نقط .

والتوقعات والتحليلات الناحية التانية في اليونايتد بتقول إن روبين أموريم مش هيستعجل ولا يندفع في الهجوم ومحاولة خطف الماتش 

ويبدأ بتنظيم دفاعي وتحفظ وعدم مبالغة في تقدم الوينجين للهجوم

ويكون كل الاعتماد علي بناء الهجوم المنظم وعلي الكرات الثابتة اللي شوفنا ليها أفكار كتير في تنفيذها من وقت ما وصل أبو ريم .

متعة مضمونة وحماس فوق السحاب بين فرقتين كل واحد فيهم بيدور علي نفسه والماتش ده بالنسبة للاتنين هو طوق نجاة نفسياً ومعنوياً قبل ال3 نقط وأهميتهم في جدول ترتيب الدوري د 

 وبالنسبة لتوقعات نتيجة المباراة … دي بقي لعبتك يا كابتني..

عايزك تقولي توقعاتك في الكومنتات ،،،

تتوقع مين الفريق اللي هيكسب ديربي مانشستر ؟؟

ولو انت جامد اوي يعني ها 

توقع النتيجة كام كام ؟؟

ولو انت بقي واصل لمرحلة الفاجر 

تتوقع مين هيسجل الأهداف في الديربي المانشستراوي ؟؟

 

ولو وصلت لحد هنا تبقي من متابعينا الأوفياء ،،

عشان دي نهاية الفيديو ،،

كل اللي عليك تقولي رأيك في الكومنتات ،،

وتعمل لايك و subscribe و share 

وكل اللي علينا فيديوهات جاية أقوي وأحلي بكتييييير