مرموش سيتي

علمتني السرقة وتبت يا معلم ؟؟

يعني بعد ما خليت كل أندية العالم تدور علي حارس مرمي بيلعب كويس برجليه 

عشان يلعب كورة ع الأرض مع المدافعين زي الحارس والمدافعين بتوعك في السيتي 

تقوم انت تخلي الحارس بتاعك يلعب ضربة المرمي طويلة في نص الملعب عادي ؟؟؟

وبعد ما كل مدربين العالم بقت بتتعلم تلعب تيكي تاكا وباص كتير 

تقوم انت فجأة مبطلها وبقيت تلعب كرات طويلة ولعب سريع وباصات مباشرة ؟؟؟

يقوم المعلم يرد عليا ويقولي :

طريقة لعب بورنموث ونيوكاسل وبرايتون وليفربول شبه طريقة لعبنا … هي دي كرة القدم الحديثة .

ده آخر كلام مهم قاله بيب جوارديولا بعد مباراتين تشيلسي وارسنال 

بس لحظة واحدة كده 

مش ليفربول وبرايتون ونيوكاسل وبورنموث دول فرق بتلعب لعب مباشر وتمريرات للأمام ورتم سريع وضغط عالي ؟

صح 

وجوارديولا ده بيلعب تيكي تاكا وتمريرات عرضية كتير ورتم بطئ ؟

صح 

اومال ازاي طريقة لعبهم شبه طريقة لعبنا اللي قالها المجنون ده ؟

الحكاية كلها هحكيهالك من أولها لآخرها ،،

بس الأول إعمل لايك و اشترك في القناة  

ده لو لا قدر الله مكنتش لسه مشترك ومفعل زي الجرس 

عشان يوصلك كل فيديوهات ومحتوي ستيب سبورت الفاخر.

ولأول مرة نشوف ضربة المرمي في مانشستر سيتي بتتلعب طويلة من حارس المرمي 

ومش قصيرة مع المدافعين زي ما بقالنا 9 سنين بنشوفها 

كل ده حصل في نفس الوقت اللي وصل فيه عمر مرموش لمانشستر سيتي 

وبسبب كل اللخبطة دي 

عاني مرموش في أول مباراة ليه مع السيتي 

وبص معايا كده علي أرقام وتقييم مرموش في مباراة آرسنال 

شبكة "سوفا سكور"، قيمت أداء مرموش

 بتقييم (6.7/10)،

 وهو من بين أقل التقييمات بين لعيبة مانشستر سيتي في المباراة.

ولعب مرموش 72 دقيقة، مسجلش ومصنعش أهداف 

ولمس الكورة 36 مرة، بنسبة دقة وصلت ل 79%، 

ومعماش ولا مراوغة واحدة ناجحة

وكان متوقع انه يقدم أداء قوي خاصة إنه بدأ أساسي للمباراة التانية علي التوالي ،، 

لكنه معملش أي بصمة د.

وطول 72 دقيقة قضاها في الملعب، 

معملش ولا تسديدة علي المرمي 

وظهر مرموش في لقطتين بس في الشوط الأول:

 في الدقيقة 18، شاك كورة طلعت بعيدة فوق العارضة .

 والتانية كانت بعدها بدقايق لما لعب ضربة ركنية، لعبها جفارديول بدماغه وطلعها رايا حارس ارسنال.

ومرموش جري كتير وعمل مجهود كبير وكل لعبه كان لعب مباشر

وعانى عمر أشد المعاناة ضد دفاعات ارسنال القوية ومن رقابة توماس بارتي عليه 

وكان طول الوقت معزول ومعندوش حلول 

وحتي الكرات اللي جاتله 

إما معرفش يستلمها أو فقدها أو اتسرع فيها 

بسبب شئ من الرهبة والضغط النفسي وعدم التأقلم علي المركز الجديد في الملعب وإنه لسه مش متعود على طريقة اللعب وزمايله الجداد.

وفي مباراته الأولى مع مان سيتي ضد تشيلسي 

لعب مرموش جناح أيسر،

 وده مركز بيلعبه مع منتخب مصر، 

لكنه ملعبوش في ألمانيا مع ناديه السابق اينتراخت فرانكفورت 

وكان مرموش دايماً بيميل في اللعب لداخل الملعب 

وساب الخط لجفارديول

ولعب مرموش 74 دقيقة وخرج بعدما لمس الكورة 

28 مرة 

معملش ولا مراوغة ناجحة 

ووقع في التسلل 3 مرات 

منهم واحدة موثرة جدآ وكان بيرناردو سيلفا هيسجل منها هدف.

وصنع فرصة كبيرة 

ودقة تمريرات %91

ودول المباراتين اللي لعبهم مرموش مع السيتي لحد دلوقتي 

وغاب عمر عن كلوب بروج في دوري الأبطال لأنه شارك مع فريقه القديم اينتراخت فرانكفورت في بطولة الدوري الأوروبي 

لكن من حقه يلعب مع السيتي عادي في دوري الأبطال من أول المباراة الجاية ضد ريال مدريد في مباراتين الملحق المؤهل لدور ال16 في التشامبيونزليج.

وبعد المبارتين دول 

عايزين ننسي التحيز وإننا عرب وعايزين مرموش ينجح ونخلي التعاطف والحب علي جنب 

ونحلل تحليل موضوعي 

عشان نقف ع أسباب المستوي السئ اللي ظهر بيه مرموش 

وعشان نحاول نتوقع اللي جاي مع بعض.

اسباب تراجع أداء ومستوي مرموش واللي خلوه اختفي في مباراتين تشيلسي وارسنال :

1/ ارسنال عرف كويس أول يقفل المساحات علي لعيبة مان سيتي. 

خاصة المساحات في العمق وده المكان اللي لعب فيه مرموش

ولعب بارتي Man to man علي مرموش وخلاه حتي مش عارف يتنفس ومنعه من التحرك بالكورة بحرية أو حتي استلام الكورة في مناطق خطر 

وده اللي مرموش هيقابله تقريباً في %90 من مباريات الدوري الانجليزي.

2/ وجود مرموش خارج منطقة الجزاء أغلب الوقت

اضطر مرموش للهروب من الرقابة والرجوع لوسط الملعب لاستلام الكورة .. وده اللي قلل خطورته تماماً.

3/ حالة مانشستر سيتي السيئة

الفريق بالكامل مستواه في الضياع ومفكك ومهلهل وفاقد الانسجام والتفاهم بين لعيبته وده أثر علي كل اللعيبة ومنهم مرموش ط.

4/ غياب التحولات الهجومية السريعة

في مباراته اللي فاتت ضد تشيلسي، اعتمد السيتي على التحولات السريعة اللي سمحت لمرموش بالاستفادة من المساحات إلي حد ما 

لكن ضد آرسنال، متعملش أي مرتدات منظمة، 

وده اللي خلاه معزول عن الهجوم.

5/ سرعة رتم البريميرليج اللي لسه مرموش متعودش عليها .

6/ لعب مرموش في الوينج الشمال وعلي الخط بيقلل من %70 من خطورته + إن الصراعات مع باكات الدوري الانجليزي في منتهي الصعوبة علي كل اللعيبة 

وكلنا شوفنا ريس جيمس عمل ايه مع مرموش في ماتش تشيلسي 

مخلاهوش يعرف يستلم كورة واحدة وفضل يضرب فيه طول الوقت وكسب جيمس كل سباقات السرعة والقوة مع مرموش.

7/ توظيف مرموش في اكتر من مكان غير اللي مرموش بيجيد فيهظ زي الوينج وصانع الالعاب وإبعاده عن مركز تألقه وهو المهاجم الصريح أو المهاجم التاني 

8/ تغيير طريقة لعب الفريق بالكامل والتحول من اللعب بالرتم البطئ والتمريرات الكتير لفريق بيلعب كورة سريعة ولعب مباشر 

وده اللي لسه اللعيبة متتعودتش عليه 

ودي النقطة اللي ترجعنا لكلامنا اللي بدأنا بيه الفيديو 

إن جوارديولا قال إن طريقة لعبه بقت شبه طريقة لعب نيوكاسل وبورنموث وليفربول وبرايتون.

.الحقيقة الراجل مغطلش 

وكلامه مظبوط 

لكن هيبقي مظبوط في حالة واحدة بس 

وهي إنه يتطبق علي آخر ماتشات لمان سيتي 

وتحديداً من أول ماتش تشيلسي وبعده ماتش ارسنال 

ودول كانوا الماتشين اللي شوفنا فيهم العجب 

وكأننا بنتفرج علي فريق مدرب تاني أول مرة نتعرف عليه 

وحرفيٱً جوارديولا حرق كل مراكبه القديمة بالأفكار والتكتيكات والجُمل والفلسفة المعقدة اللي مستحيل أي لاعب في الفريق يفكر يخرج عنها 

وحتي جوه المباراة الواحدة بيب بيغير أفكاره وطرق لعبه 

مثلا زي ما قال بعد ماتش ارسنال :

وبعد التعادل 1-1 أردنا تغيير الطريقة ونقل مرموش كمهاجم ثانٍ، لكننا تلقينا هدفين متتاليين"

والوقت اللي احنا فيه ده احنا في مرحلة شك 

وبدأنا نسأل أسئلة من نوعية 

هل انتقال مرموش للسيتي كان قرار صح ؟؟

وهل مرموش لعيب جامد فعلا ويستحق يكون في المكان ده وفي الفريق ده والمستوي ده ؟؟

 والحقيقة إن الشيخ منصور اكيد مش بيرمي فلوسه في الأرض 

وجوارديولا مش عبيط عشان يوافق إن النادي يدفع 75 مليون يورو في لعيب هو شاكك إنه هينجح

د

17 ماتش في الدوري لعبهم كلهم أساسي 

وفي ال17 ماتش دول ،،، ساهم في 24 هدف

سجل 15 هدف وصنع 9 

وفي اليوروباليج 6 ماتشات شارك فيهم كلهم وساهم في 6 أهداف 

سجل 4 وصنع 2 

حتي ماتشات الكاس مسابهاش 

لعب مع فريقه 3 ماتشات وسجل هدف وصنع هدفين

في كل البطولات مساهم في 30 هدف

مسجل 20 هدف وصانع 13

وبعد انفجار مرموش ،، وتقديمه مستويات مذهلة ،،، وأدائه المميز 

وجودته في تسجيل الأهداف وصناعتها ،،، وتنفيذ الركلات الحرة 

والسرعة والقوة البدنية ،،، اللي حطوه في مكانه عالية جداً

 

وكانوا سبب إن مان سيتي تعاقد معاه بالمبلغ الكبير جدا ده

وكلنا عارفين إن مانشستر سيتي بدأ فعلاً مرحلة الإحلال والتجديد والصيف الجاي هيحصل فيه مدبحة لعدد كبير من اللعيبة 

لكن لحد ما ده يحصل 

مرموش هيكون عنده لعيبة بتزاحمه وبتاخد من دقايق لعبه 

زي دوكو وسافينيو وچاك جريليش و اوسكار بوب بعد ما يرجع من الإصابة وحتي كلاوديو اتشڤيري الشاب الارجنتيني الصفقة الجديدة للفريق

في النهاية انضمام مرموش للسيتي حصل في التوقيت الغلط 

والريسك كبير جداً في مسيرة مرموش .

عايز تقولي في الكومنتات 

هل في رأيك كان أفضل لمرموش الانتقال لنادي تاني غير مان سيتي ؟؟

زي مانشستر يونايتد ولا توتنهام ولا ليفربول ؟

وهل هينجح مرموش مع السيتي ولا القرار كلن غلط والموضوع موضوع وقت ومرموش هيلعب في نادي تاني؟

ولو وصلت لحد هنا تبقي من متابعينا الأوفياء ،،

عشان دي نهاية الفيديو ،،

كل اللي عليك تقولي رأيك في الكومنتات ،،

وتعمل لايك و subscribe و share 

وكل اللي علينا فيديوهات جاية أقوي وأحلي بكتييييير