ميركاتو يناير 2025

كل سنة وانت طيب يا أبو الكباتن بمناسبة السنة الجديدة 2025 

ويارب كل سنة أعيد عليك وانت بتتفرج علي فيديو السنة الجاية وانت وكل حبايبك بخير وسعادة وتكون حققت كل اللي تتمناه 

وعشان انت أفخم وأفخر متابع في الكوكب 

حلقة النهاردة غير كل حلقة وغير أي حلقة 

النهاردة بنقدملك خدمة 7 نجوم 

ومش هتلاقيها عند أي حد تاني ولا في يوتيوب ولا في تليفزيون 

هتلاقيها بس في أكبر منصة رياضية في الوطن العربي 

ستيب سبورت 

النهاردة هوفر عليك متابعة أخبار انتقالات يناير وهجمعلك أخبار الفرق كلها ،،،، في فيديو واحد جاحد فاجر فاخر من الآخر 

وعشان تفهم النظام هيمشي ازاي 

هقولك كل نادي واللعيبة اللي بيتفاوض معاها وبنسبة كبيرة هيتم التعاقد معاهم ،،،، وكمان هعرفك اللعيبة اللي هتمشي من كل فريق

صحصحلي بقي وركز معايا ،،، ويلا بينا نبدأ سريع سريع 

بس عندنا حاجتين مهمين قبل ما نبدأ ،،،،

الحاجة الأولي إعمل لايك و اشترك في القناة  

ده لو لا قدر الله مكنتش لسه مشترك ومفعل زي الجرس 

عشان يوصلك كل فيديوهات ومحتوي ستيب سبورت الفاخر..

والحاجة التانية هي السؤال المعتاد الموجه فقط لمتابعينا المحنكين 

خبراء الكورة اللي بجد ،، وعين أعيان كل متابعين منصات اليوتيوب ،،،،،، متابعين ستيب سبورت 

والسؤال هو 

ما هي أرقام تيشرتات اللعيبة التالية مع أنديتهم ؟؟

1- لامين يامال مع برشلونة ؟

2- لويس دياز مع ليفربول ؟

3- كول بالمر مع تشيلسي ؟

وقف الفيديو لحظة واحدة وجاوب السؤال في الكومنتات..

شد حزامك يا كابتن ويلا بييييينا… وادخل اتطمن علي فريقك

برشلونة 

أول الكلام كده البارسا داخل علي مدبحة في الصيف الجاي 

بس قبل المدبحة والتصفية اللي هتحصل ،،، خليني اقولك الأخبار الحلوة الأول…

الصفقة الجديدة قلب الدفاع الألماني جوناثان تاه 

بعد ما كان علي وشك يلبس تيشرت البايرن وكمان كان قريب من ريال مدريد…. خطفته البارسا من بوق الأسد.

ورغبة اللاعب حسمت القصة وبنسبة %85 تاه برشلوني في يناير في صفقة مجانية من ليفركوزن الألماني.

والأخبار الحلوة يعني فلوس داخلة خزنة كتالونيا والفلوس جاية من ليفربول شخصياً 

 بعد ما دخل الريدز في مفاوضات مع نيكو جونزاليس لاعب بورتو البرتغالي اللي مولع الدنيا الموسم ده،،،

والبارسا عنده خيار إعادة شراء لاعبه السابق نيكو ب30 مليون يورو والبند ده ينتهي 2025 وطبعاً مفيش فلوس لتفعيل البند.

عشان كده بيع جونزاليس لليفربول هيدخل لبرشلونة %40 من قيمة المبلغ اللي هيدفعه ليفربول في نيكو 

كمان البارسا استقر علي عدم التجديد لروبرت ليفاندوفسكي اللي مع نهاية عقده هيكون عنده 37 سنة 

والموضوع اتحسم وإدارة البارسا بتخلص في ملف مهاجم جديد يحل محله.

أنسو فاتي لو جاب أي عقد بيع أو إعارة برشلونة هيوافق.

بابلو توري اللي جايله عروض كتير لكن برشلونة متمسك بيه جداً وهيجددله عقده وهيرفض كل العروض حتي الإعارات.

والأخبار الوحشة منها إن المحكمة التجارية رفضت تسجيل عقد داني أولمو مع برشلونة وحاول البارسا تسجيل العقد قبل 31 ديسمبر 2024 عشان العقد مع أولمو بتسجيل مؤقت لمدة 6 شهور.

ورفضت رابطة الدوري الإسباني تسجيل عقد أولمو بسبب مشكلة سقف رواتب اللعيبة عند النادي.

خلي بالك داني أولمو عنده بند في عقده يسمحله بالرحيل مجاناً عن برشلونة لو فشل النادي في تسجيل عقده.

والمدبحة اللي قولتلك عليها دي بقي يا سيدي فيها تضحية وتصفية للعيبة كتير وهما

فرينكي دي يونج، أندرياس كريستنسن، إريك جارسيا، وأنسو فاتي

منهم يخلصوا منهم ومنه يوفروا سيولة محترمة للصفقات الجديدة.

ريال مدريد 

سيبايوس حبيس الدكة جايله عروض من انجلترا ومن إسبانيا وريال مدريد مش هيمانع بيعه أو إعارته

و إدارة نادي ريال مدريد خلاص أنهت اهتمامها وصرفت نظر عن التعاقد مع لاعب الوسط الشاب فرانكو ماستانتونو، بسبب الشرط الجزائي في عقده الجديد 45 مليون يورو مع نادي ريفر بليت الأرجنتيني.

وش كده وبدون لف ودروان وإشاعات 

الملكي المدريدي مش هيتعاقد مع أي لعيبة في ميركاتو يناير الحالي،،،،،، والخطة إنه هيحط كل تركيزه ويحوش كل فلوسه للصيف الجاي 

برغم الإصابات في خط الدفاع قرر يمشي حاله بالشاب اسينسيو وتشواميني لحد ما يجي الصيف ويفجر مفاجآت عيار تقييييييل

الكل عارف إنها مسألة وقت ونشوف ترينت الكسندر ارنولد لابس الأبيض الملكي وموجود في تشكيلة ريال مدريد من أول الموسم الجاي بعد رفضه كل عروض التجديد مع ناديه ليفربول.

زيه زي النفاثة الفونسو ديفيز هو كمان جاي جاي مع ارنولد.

وهما دول الصفقتين اللي يداوو الجراح وينسوا اللي راح ويغسلوا المشجع المدريدي 

التفكير الجديد دلوقتي للمافيا فلورنتينو بيريز والعراب مستر كارلو أنشيلوتي في مركزين اتنين بس 

وهما لاعب وسط ملعب يعوض توني كروس 

وكان التفكير في انزو فيرنانديز لكن خلاص مدريد صرف نظر

ودلوقتي عينه علي البرتغالي فيتينا لاعب باريس سان جيرمان 

والمركز التاني هو قلب الدفاع 

وده كل الكلام فيه عن الفرنسي الدولي ويليام ساليبا مدافع ارسنال 

 

مانشستر يونايتد 

راشفورد ولا حديث إلا عن الدكتور راشفورد 

خلاص وضحت النهاية واتكتب آخر سطر في الحكاية 

وماركوس راشفورد ماشي ماشي 

السؤال هو هيمشي يروح فين ؟؟

يوفنتوس عايز راشفورد وعارض 50 مليون يورو 

والدكتور ماركوس نفسه موافق ومرحب بالفكرة 

كمان الدوري السعودي فيه خمس أندية طالبة التعاقد مع راشفورد 

حتي لو علي سبيل الإعارة 

كمان بايرن ميونيخ وتوتنهام مهتمين جداً وبيراقبوا وضعه عن قرب.

واليونايتد عشان يسهل عملية خروجه ،،،، معندوش مشكلة يدفع جزء من ال375 ألف جنيه استرليني ،،،، اللي هما مرتبه الأسبوعي بالبونص 

نيجي للمهم بقي وهو الصفقات الجديدة 

وأولهم الطير الجارح النسر النيجيري فيكتور اوسيمين المعار من نابولي لنادي جالاتا سراي التركي.

وخطة نابولي في الصفقة هي خطف واحد من نجوم اليونايتد (راشفورد أو هويلوند أو زيركزي) وتبقي صفقة تبادلية مع اوسيمين 

وكمان إدارة المانيو قريبة جداً من التعاقد مع النجم السويدي فيكتور جيوكيرس نجم سبورتنج لشبونة.

و نونو مينديش الباك الشمال العالمي لباريس سان جيرمان صاحب ال22 سنة 

قريب جداً من الانضمام للشياطين الحمر وروبين أموريم شخصياً مهتم بالصفقة ومتابعها وهو اللي أقنع الدولي نونو بمشروع اليونايتد.

وكاسيميرو مانشستر بيدعي ليل ونهار حد غشيم وعدو نفسه ومبيفهمش يجي يشتري منهم الابتلاء اللي إسمه كاسيميرو 

وفي السكة كده المانيو وقع مع لاعب شاب إسمه ديبجو ليون من نادي سيرو بروتينيو ب 4 مليون دولار 

  مركزه باك شمال وعنده 17 سنة 

والمنتظر وصوله النادي وانضمامه بشكل رسمي بدايةً من أول الصيف الجاي لما يتم 18 سنة.

مانشستر سيتي 

قالها بيب جوارديولا صريحة مريحة 

سوق الانتقالات في الشتاء ليس سهلاً. لكننا نريد لاعبين للسنوات الثلاث أو الأربع أو الخمس المقبلة”.

استفتح السيتي الصفقات وحسم صفقة الإسباني مارتن زوبيمندي البديل الشرعي لإبن بلده البالوندوري رودري

وقرر السيتي تفعيل الشرط الجزائي ودفع ال50 مليون لريال سوسيداد ويكون زوبيمندي أول صفقة للنادي في الميركاتو الشتوي الحالي.

 ومخلصتش الصفقات هنا ،، ده انا لسه بقولك ده يا دوب استفتح 

السيتي ما شاء الله محقق أرباح 139 مليون جنيه إسترليني (177 مليون دولار) من مبيعات اللاعبين، عشان الميركاتو ده هيبقي ناااااار للسيتي 

لسه النادي هيتعاقد مع مدافع بعد إصابة روبين دياز واقتراب رحيل كايل ووكر ولسه كمان مهاجم يكون بديل لهالاند ويعوض رحيل جوليان الفاريز لاتليتكو مدريد ولستة المطلوب التعاقد معاهم كمان لسه فيها باك شمال.

والصفقة الجديدة الأرجنتيني الشاب صاحب ال18 سنة إتشيفيري تم التعاقد معاه رسميا ب 12.5 مليون جنيه إسترليني من ريفر بليت من سنة

وهينضم لتشكيلة جوارديولا في النص التاني من الموسم الحالي.

ليفربول 

عنده ملفات كتير مهمة زي التجديد لأهم لعيبة في الفرقة اللي عقودهم بتنتهي زي محمد صلاح وألكسندر ارنولد وفان دايك 

لكنه في نفس الوقت بيفكر في المستقبل وبدأ التفاوض مع لاعب الوسط الشاب صاحب ال22 سنة الإسباني نيكو جونزاليس من بورتو البرتغالي 

وكمان بيستفسر عن تشواميني من ريال مدريد وارني سلوت مهتم جداً بضمه لخط وسط الريدز 

كمان روبنسون باك شمال فولهام الانجليزي بدأ ليفربول الاستفسار عنه وعن إمكانية التعاقد معاه 

ارسنال 

بعد عملية جراحية عملها نجم الفريق بوكايو ساكا هيغيب بسببها لمدة تزيد عن شهرين 

بدأ ارسنال يتحرك بسرعة جداً لتعزيز خط هجومه 

عشان يلاقي بظيل لساكا وعشان يصلح ارتيتا غلطته لما قرر عدم ضم مهاجمين الصيف اللي فات وقرر الاعتماد علي كاي هافرتز وتطويره في مركز المهاجم الصريح 

وبرغم تألق جابرييل جيسوس إلا إنه الموضوع موضوع وقت وهيتصاب تاني 

فقرر ارسنال التعاقد مع الفرنسي كولو مواني مهاجم باريس سان جيرمان علي سبيل الإعارة مع بند إلزامية الشراء 

مواني بيلعب في كل مراكز الهجوم لكن مركزه الأساسي هو رأس حربة 9 

وزينشنكو هو اللاعب الوحيد من الجانرز الأقرب للخروج من النادي سواء بالبيع أو الإعارة.

تشيلسى 

انت كنادي ملياري ربنا يزيدك عندك 3 تشكيلات بتلعب في الدوري بتشكيل وفي بطولة دوري المؤتمرات بتشكيل تاني مختلف بالكامل 

ف انت أكيد عكس الناس بتفكر تبيع لعيبة مش تشتري لعيبة 

عشان كده نكونكو هو أقرب الراحلين من البلوز 

والكلام علي عرض برشلونة المتقدم لتشيلسي للتعاقد مع كريستوفر نكونكو لنهاية الموسم.

بين تشيلويل الباك الشمال هو كمان جايله عروض كتير وبنسبة كبيرة جدا هيتحرك من تشيلسي في الميركاتو ده.

 

باريس سان جيرمان 

دوناروما بيلمح للخروج من باريس 

وأندية إنجليزية كتير مهتمة جدااااا بضم الإيطالي دوناروما

المدافع سكرينيار اللي تم تهميشه بالكامل الموسم ده مع لويس انريكي اللي اشركه 5 ماتشات بس من أول الموسم هيكون اول الراحلين من باريس

 

انتر ميلان الميركاتو ده بيدور علي مدافع لضم قلب دفاع في يناير بسبب معاناة فرانشيسكو أتشيربي المستمرة مع الإصابات.

و النيراتزوري منفتح على بيع أو إعارة مهاجمه ماركو أرناوتوفيتش لنادي تورينو في يناير بعد خروجه من الحسابات الأساسية للفريق.

دي ماركو مانشستر سيتي إشاعة بدأت تتحول لمفاوضات حقيقية وهو أول إسم علي لستة السيتي في تدعيم مركز الباك الشمال.

لاوتارو مارتينيز هو كمان عليه كلام كتير وقوي من مانشستر سيتي بردو والصحافة بتقول إن السيتي قرر يدفع 100 مليون يورو في مارتينيز وده هو المبلغ اللي طالبه انتر في اللاعب. 

يوفنتوس  

قرر التعاقد مع تونالي من نيوكاسل وعشان يوفر مبلغ ال55 مليون يورو اللي طالبهم نيوكاسل للتخلي عن تونالي 

قرر اليوفي التفكير في بيع نيكولو فاجيولي والبرازيلي دوجلاس لويز والموهبة الفتاكة كينان يلدز لو جاله عرض مناسب برقم كبير من أندية الصف الأول 

زيركزي الشهير بعلي ربيع مهاجم مانشستر يونايتد هو كمان قريب جداً من يوفنتوس لمدة 6 شهور علي سبيل الإعارة 

لسه سلسلة ميركاتو يناير ليها أجزاء وحلقات تانية

خليها متابعنا واحنا هنتابعك بكل جديد أول بأول وقبل أي حد 

ولو وصلت لحد هنا تبقي من متابعينا الأوفياء ،،

عشان دي نهاية الفيديو ،،

كل اللي عليك تقولي رأيك في الكومنتات ،،

وتعمل لايك و subscribe و share 

وكل اللي علينا فيديوهات جاية أقوي وأحلي بكتييييير